1 майдан “Ғузор – Бухоро – Нукус – Бейнов” йўлининг Элликқалъа, Тўрткўл, Беруний ҳудудидан ўтган 25 километри реконструкция қилинади
Айни вақтда президент Шавкат Мирзиёев раислигида Қорақалпоғистон Республикаси Кегейли туманида йиғилиш бўлиб ўтмоқда. Бу ҳақда “Дарё” мухбири хабар берди.
Президент мутасаддиларга Қорақалпоғистонда амалга оширилиши керак бўлган масалалар юзасидан қатор топшириқлар берди. Хусусан, йил якунига қадар Миллий банк ташаббуси асосида бошқа туманларга бириктирилган банклар ҳам камида учтадан катта саноат лойиҳаси амалга оширилади.
Президент аҳолига деҳқончилик қилишга бериладиган ерларда чорвага озуқа етиштириш учун 5 гектаргача ажратиш таклифини қўллаб-қувватлашини билдирди.
2023 йилда Қорақалпоғистондаги мева-сабзавотчилик ва чорвачилик лойиҳаларига 10 миллион доллар йўналтирилади. 1-октябрга қадар Бўстон каналини бетонлаш иши якунланиб, 100 минг гектарда сув таъминоти яхшиланади. Бунинг ҳисобига 23 та насос станцияси ва 400 та насос агрегати тўхтатилиб, келгуси йилдан йилига 45 миллион киловатт электр иқтисод қилинади.
Амударё, Бўзатов, Чимбой, Элликқалъа, Қонликўл, Кегейли, Тахиатош, Қораўзак, Хўжайлида йил якунигача:
- 1 тадан 100-150 ўринли боғча давлат ҳисобидан қуриб берилади;
- барча мактаблар ва шифохоналарни таъмирлашга, шу жумладан иссиқлик таъминотини қилиб беришга қўшимча маблағ ажратилади.
1 майдан “Ғузор – Бухоро – Нукус – Бейнов” йўлининг Элликқалъа, Тўрткўл, Беруний ҳудудидан ўтган 25 километри реконструкция қилиш ишлари бошланади.
