Ўзбекистонда март бошидан буён 10 тоннага яқин сифатсиз озиқ-овқат маҳсулоти истеъмолдан чиқарилди

Ўзбекистонда 1 мартдан бошлаб ўтказилаётган “Фавқулодда вазиятлардан муҳофаза қилиш ва фуқаро муҳофазаси ойлиги” давомида 10 минг килограммга яқин сифатсиз озиқ-овқат маҳсулоти истеъмолдан чиқарилди. Бу ҳақда 28 март куни ўтказилган брифингда ФВВ бошқарма бошлиғи Зуҳриддин Қаҳрамонов маълум қилди.

Ушбу ойликдан кўзланган мақсад баҳор мавсумида юзага келиши мумкин бўлган фавқулодда вазиятлар, хусусан, сел, тошқин ва кўчки ҳодисалари, овқатдан заҳарланиш ҳамда Қрим-Конго геморрагик иситма касаллиги билан боғлиқ фавқулодда вазиятларнинг олдини олишга қаратилган тадбирларни  кенг қамровда амалга оширишдир.

Зуҳриддин Қаҳрамоновнинг қайд этишича, республика бўйича 2100 дан ортиқ иқтисодий  ва 23 574 та ижтимоий объектлар, шунингдек, сел, тошқин ва кўчкига хавфли 144 та объектлар ўрганиб чиқилиб, аниқланган камчиликларни бартараф этиш чоралари кўрилди. 69 та дарё ва каналлар ўзанлари тозаланиб, 6 та дарёлар қирғоқларини мустаҳкамлаш ишлари бажарилди.

“Ўзгидромет” хизмати агентлиги, Хавфли жараёнларни кузатиш давлат хизмати билан биргаликда сел, тошқин ва кўчкига хавфли ҳудудлардаги хўжаликларни ўрганиб чиқиб, хавфли ҳудудлардаги 2 та хўжалик доимий ва 13 та хўжалик  вақтинчалик кўчирилди. Сел йўлларини тозалаш, қирғоқни мустаҳкамлаш каби муҳандислик-муҳофаза ишлари бажарилди.

Техноген хусусиятли фавқулодда вазиятларнинг олдини олиш тадбирлари давомида республикадаги сув ва сел-сув омборлари ҳамда бошқа гидротехник иншоотлар ўрганиб чиқилиб, уларнинг техник мустаҳкамлик ҳолатини яхшилаш ва мавсумга шайлигини таъминлаш чоралари кўрилди. 

Бундан ташқари, аҳолининг сифатсиз озиқ-овқат махсулотларидан заҳарланишининг олдини олиш мақсадида Ҳудудий Санитария-эпидемиологик осойишталик ва жамоат саломатлиги бошқармалари билан биргаликда жами 17 мингдан ортиқ бозорлар, савдо мажмуалари ва бошқа объектларда ўрганишлар олиб борилди.

Қрим-Конго геморрагик иситмаси касаллигининг олдини олиш бўйича Санитария-эпидемиологик осойишталик ва жамоат саломатлиги бошқармалари, ветеринария хизмати билан биргаликда 16 760 та объектлар ўрганилиб, 900 минг метр квадратдан ортиқ майдон дезинсексия қилиш орқали зарарсизлантирилди.

Юқоридагилардан ташқари, 6 266 та таълим муассалари, шифохоналар , ишлаб чиқариш ва бошқа ижтимоий –иқтисодий объектларда ўтказилган “Фуқаро муҳофазаси куни” тадбирларида иштирокчиларнинг фавқулодда вазиятларда, хусусан, зилзилаларда тўғри ҳаракат қилиш бўйича билим ва кўникмалари оширилди.