Февралда Ўзбекистонда энг кўп қайси автомобиль ишлаб чиқарилди?

Ўзбекистонда февраль ойида 22 719 дона енгил автомобиль ишлаб чиқарилган. Бу ҳақда Давлат статистика агентлиги хабар берди.

Маълумотларига кўра, февраль ойида мамлакат бўйлаб энг кўп Cobalt ишлаб чиқарилган — 7 673 дона. Ўтган йилнинг шу даврида ушбу русумдаги автомобилнинг ишлаб чиқарилиш ҳажми 7 394 донани ташкил этган.

Февралда энг кўп ишлаб чиқарилган автомобиллар орасида Damas иккинчи ўринни эгаллади —  6 149 дона. Бу кўрсаткич ўтган йилнинг шу даврига нисбатан 518 тага ошган.

Учинчи ўринда 5 174 дона ишлаб чиқарилган Lacetti-Gentra жойлашган. 2022 йилнинг мос даврида эса у энг кўп ишлаб чиқарилган автомобиль бўлган эди — 8 124 та. 

Кейинги ўринларда эса Tracker (1 087 дона), Nexia Т-250 (467 дона) ва махсус енгил автомобиллар (2 057 дона) жойлашган.

Бундан ташқари Ўзбекистонда Onix ишлаб чиқариш ҳам февраль ойидан йўлга қўйилди — 112 дона автомобиль.

Аввалроқ Ўзбекистонда февраль ойида автомобиллар сотуви камайгани ҳақида хабар берилганди.