Туркия президентлигига номзод Дўғу Перинчек сайловда ғалаба қозонса, мамлакатни НАТОдан чиқаришга ваъда берди
Туркия президентлигига номзод ва “Ватан” партияси етакчиси Дўғу Перинчек сайловларда ғалаба қозонса, Анқарани НАТОдан чиқаришга ваъда берди. Бу ҳақда туркиялик сиёсатчи “РИА Новости”га маълум қилди.
Перинчек бундай қадамни сўровнома натижаларига кўра, турк аҳолисининг 80 фоизи АҚШни таҳдид, 70 фоизи эса Россия ва Хитойни дўст деб билиши билан изоҳлади. “Бизнинг бошқарувимиз остида Туркия НАТОдан албатта чиқади, чунки НАТО Туркия учун ягона таҳдиддир”, — деди Перинчек.
Сиёсатчи Ғарбнинг Россияга қарши санкцияларини тан олмаслигини, агар сайловда ғалаба қозонса, уларга қарши курашишини қўшимча қилди. “Россияга қарши санкциялар Туркияга қарши санкциялардир, биз эса бу санкцияларга қарши курашиш учун олтин имкониятдан фойдаланамиз”, — деди у.
Туркияда умумий сайловлар 14 май куни бўлиб ўтади. Мамлакат халқи президент ва 600 нафар парламент аъзосини сайлайди. Қонунга кўра, Туркияда умумий сайловлар 18 июнгача ўтказилиши керак, бироқ январь ойида амалдаги президент Ражаб Тоййиб Эрдўғон уларни бир ой аввал ўтказиш ташаббуси билан чиққан. Февраль ойи бошида мамлакат тарихидаги энг йирик зилзиладан сўнг Эрдўғон штаб-квартираси фалокат туфайли сайловларни 18 июнга кўчиришни таклиф қилган, бироқ Туркия раҳбари буни рад этган.
Дўғу Перинчек 80 ёшда. У президентлик сайловида биринчи марта қатнашаётгани йўқ. 2018 йилги сайловларда унга 98 926 киши (0,2 фоиз) овоз берган, ўшанда Эрдўғон 52,59 фоиз овоз олган. 2022 йил февраль ойи бошида Перинчек НАТОнинг шарқ томон кенгайиши нафақат Россия, балки Туркия, Эрон ва Хитой, шунингдек, иттифоқнинг ўзига ҳам хавф туғдириши ҳақида гапирган.
