Асака тумани собиқ ҳокими иши юзасидан қўшимча маълумот берилди
24 март куни Андижон вилояти прокуратурасида бўлиб ўтган матбуот анжуманида Асака тумани собиқ ҳокими Мансур Алихоновга нисбатан Жиноят кодексининг 5 та моддаси бўйича жиноят иши қўзғатилгани маълум қилинганди. Олий суднинг жамоатчилик ва ОАВ билан алоқалар бошқармаси бошлиғи Азиз Обидов мазкур иш ҳақида расмий ахборот берди.
Таъкидланишича, мазкур ишни Жиноят ишлари бўйича Пахтаобод туман суди кўриб чиққан. Мазкур суднинг 2023 йил 27 январдаги ҳукми билан М. А. Жиноят кодексининг 167-моддаси (ўзлаштириш ёки растрата йўли билан талон-торож қилиш) 3-қисми “а” банди, 205-моддаси (ҳокимият ёки мансаб ваколатини суиистеъмол қилиш) 2-қисми “а” банди, 209-моддаси (мансаб сохтакорлиги) 2-қисми “а” банди ва 229-4-моддаси (ер бериш тартибини бузиш) 2-қисми “а”, “б” бандларида назарда тутилган жиноятларни содир этганликда айбли деб топилиб, унга 2 йил муддатга мансабдорлик ва моддий жавобгарлик вазифаларида ишлаш ҳуқуқидан маҳрум қилиб, 3 йил-у 1 ой муддатга озодликни чеклаш жазоси тайинланган.
“Шунингдек, ушбу ҳукмга кўра, У. С. (Асака тумани қишлоқ хўжалиги бўлими бошлиғи лавозимида ишлаган) Жиноят кодексининг 205-моддаси 2-қисми “а” банди ва 229-4-моддаси 2-қисми “а”, “б” бандларида назарда тутилган жиноятларни содир этганликда айбли деб топилиб, унга 2 йил муддатга мансабдорлик ва моддий жавобгарлик вазифаларида ишлаш ҳуқуқидан маҳрум қилиб, 3 йил-у 1 ой муддатга озодликни чеклаш жазоси тайинланган.
Бундан ташқари Кадастрлар палатаси Асака тумани филиали мутахассиси лавозимида ишлаган О.Қ. ҳам Жиноят кодексининг 168-моддаси (фирибгарлик) 3-қисми “б”, “в” бандларида назарда тутилган жиноятни содир этганликда айбли деб топилиб, унга 2 йил муддатга мансабдорлик ва моддий жавобгарлик вазифаларида ишлаш ҳуқуқидан маҳрум қилиб, иш ҳақининг йигирма фоиз миқдорини давлат даромади ҳисобига ушлаб қолган ҳолда 3 йил муддатга ахлоқ тузатиш ишлари жазоси тайинланган.
Судланувчилар М.А. ва У.С.нинг ҳимоячилари билан биргаликда биринчи инстанция судининг ҳукми устидан келтирган апелляция шикоятлари асосида жиноят ишининг уларга оид қисмини Андижон вилоят судининг апелляция инстанциясида кўриб чиқиш учун 2023 йил 30 март кунига тайинланган”, —дейилади расмий ахборотда.
Эслатиб ўтамиз, 2022 йилнинг 27 сентябрь куни Президент администрацияси раҳбари Сардор Умурзоқов раҳбарлигида ўтказилган видеоселектор йиғилишда ер муносабатларини тартибга солишга оид қонунчилик ҳужжатларига риоя этмагани, фаолиятида йўл қўйган бошқа жиддий қонун бузилиш ҳолатлари учун Мансур Алихонов туман ҳокими лавозимидан озод этилганди.
“Асака тумани ҳокими жаноб Алихонов. Ер ажратиш масаласида 56 та қарор билан 2 минг 390 гектар ер ноқонуний ажратилган. 2021—2022 йилларда, бир ярим йилнинг ичида ер билан боғлиқ ноқонуний ҳолатлар бўйича 15 та жиноий иш қўзғатилган. Шунинг учун бугун президентимизнинг қарорлари билан сиз ҳам лавозимингиздан озод этиласиз”, — деган эди Сардор Умурзоқов.
Фақат ер ажратиш эмас, 2021 йилнинг декабрь ойида Асака тумани ҳокими Мансур Алихонов аҳоли билан номақбул тарзда суҳбатлашгани акс этган видео тарқалганди. Ҳолат ижтимоий тармоқларда кенг муҳокамаларга ва жамоатчиликнинг эътирозларига сабаб бўлганди.
Мансур Алихонов 2020 йилнинг сентябрь ойида Асака тумани ҳокими лавозимига тайинланган. У мазкур тайинловга қадар Жалақудуқ тумани ИИБ бошлиғи лавозимида фаолият юритган.
