Ўзбекистон 2023 йилда 14 та самолёт сотиб олди

Ўзбекистон 2023 йилнинг январь—февраль ойларида хориждан қиймати 719,6 млн долларга тенг бўлган 14 та самолёт импорт қилган. Бу ҳақда Статистика агентлиги хабар бермоқда. 

Мамлакат январь ойида 13 та, февраль ойида яна 1 та самолёт сотиб олди. Сотиб олинган самолётларнинг 6 таси Германияга, 4 таси эса Литвага тўғри келади. Уларнинг қиймати мос равишда 421,7 млн доллар ва 66,7 млн долларни ташкил қилган. 

Қайд этилишича, февралда Швейцариядан 86,5 млн долларлик самолёт сотиб олинган. Бундан ташқари, 2023 йилнинг илк икки ойида Франция, Сингапур ва Буюк Британиядан ҳам биттадан самолёт сотиб олган. 

Маълумот учун, 2022 йилда Ўзбекистонда халқаро йўналишларда белгиланган график асосида 15 192 та авиапарвоз амалга оширилган. Маҳаллий йўналишларда 6345 та авиапарвозлар амалга оширилган. 

2022 йилда халқаро йўналишларда бир кунда ўртача 41 та авиапарвозлар кузатилган.