Қашқадарё вилоятининг шаҳар ва туманларидаги мавжуд ер майдонларининг 2,5 миллион гектари Узкад тизимига киритилгани маълум бўлди. Бу ҳақда Давлат кадастрлари палатаси Қашқадарё вилояти бошқармаси бошлиғи Ғайрат Ҳамроев Миллий матбуот марказида бўлиб ўтган матбуот анжуманида маълум қилди.
Таъкидланишича, 2022 йил давомида Давлат кадастрлари палатаси Қашқадарё вилояти бошқармаси ва унинг туман, шаҳар филиаллари томонидан вилоятнинг мавжуд 2,9 миллион гектарга яқин ер майдонларидан 2,5 миллион гектари миллий геоахборот тизими ёки Узкад ягона интеграциялашган дастурида акс эттирилган.
“Илгари ер баланси ҳисоботлари фақатгина қоғоз жадвалларидаги рақамларда юритилганлиги боис тегишли ўзгартиришларни киритиб бориш инсон омилига боғлиқ бўлиб, қўлда киритиб келинган. Узкад ягона интеграсиялашган дастурда эса ер майдонларининг бўлиниши, чегаралари ва ерга оид барча маълумотлар электрон хариталарда шакллантирилганлиги, барча ердан фойдаланувчиларнинг ҳуқуқлари кафолатланганлиги, ер ва мулк солиқларининг ҳисобланиши ва тўланишида шаффофлик тамойиллари таъминланганлиги каби ижобий натижалари кўриш мумкин”, — дейди бошқарма бошлиғи Ғайрат Ҳамроев.
Матбуот анжуманида, шунингдек, аҳолига кўрсатилган кадастр хизматлари ҳақида ҳам маълумот берилган.
Қайд этилишича, кўчмас мулкларга кадастр паспортларини шакллантириш юзасидан 2022 йил давомида жами 48 мингдан зиёд аризалар келиб тушган. 2021 йилга нисбатан аризалар сони 11 минг 400 тага ошган, шунингдек, ер ва бино иншоотларга бўлган ҳуқуларни давлат рўйхатидан ўтказиш юзасидан 60 минг 300 та ариза келиб тушган бўлиб, бунда аризалар 14 мингтага кўпайган.
“Аризалар сони аҳолига кўрсатилаётган хизматларга фуқароларнинг ишончи ортганидан дарак беради”, — дейди бошқарма ахборот хизмати раҳбари Намоз Чориев.
Изоҳ (0)