Наманган вилояти Уйчи туманида ДХХга ишга киритиб қўйиш учун фуқаролардан пул олиб келган сохта ИИБ ходими ушланди. Бу ҳақда Ички ишлар вазирлиги ахборот хизмати хабар берди.
Хабарга кўра, мазкур шахс Ички ишлар вазирлиги шахсий хавфсизлик бош бошқармаси Наманган вилоят бошқармаси ходимлари томонидан ИИО ходимларини обрўсизлантириш ҳолатларининг олдини олиш юзасидан олиб борилаётган тезкор ва порфилактик тадбирлар давомида ушланган. 1996 йилда туғилган фуқаро ўзини вилоят ИИБда ишлаши, амакиси эса ДХХда юқори лавозимлардан бирида фаолият олиб боришини айтиб фуқароларни алдаб келган. Уларга ҳуқуқни муҳофаза қилувчи идораларга, хусусан, ИИО ёки ДХХга ишга киритиб қўйишни ваъда қилиб, фирибгарлик йўли билан пулларини олиб юргани аниқланди.
Жумладан, 2022 йилнинг ноябрь ойида у Фарғона вилояти Риштон туманида яшовчи фуқарога ИИОга ишга киритиб қўйишни ваъда қилиб, алдов йўли билан дастлаб 800 доллар олиб, кейинчалик ДХХнинг Тошкент вилояти бўйича бошқармасига ишга киритиб қўйишни ваъда қилиб, жами 7 минг 600 АҚШ доллари олган.
Бундан ташқари, Андижон туманида яшовчи фуқарога ҳам худди шундай ваъда қилиб, 500 АҚШ доллари ва 320 минг сўм пулларни олгани маълум бўлди. У фуқароларни ишонтириш учун ИИО ходимларининг маҳкама хизмат кийимини тиктириб, шу кийимда уларни чув тушириб юрган.
Ҳолат бўйича Наманган шаҳри ИИО ФМБ ҳузуридаги тергов бўлими томонидан унга нисбатан Жиноят кодексининг 168-моддаси 3-қисми ва 28-модда орқали 211-моддаси 2-қисми билан жиноят иши қўзғатилиб, қамоққа олинган. Ҳозирда тергов ҳаракатлари олиб борилмоқда.
Изоҳ (0)