Бокс бўйича аёллар ўртасидаги ЖЧ—2023. Уч нафар ўзбекистонлик боксчи чорак финал йўлланмасига эга чиқди

Ҳиндистон мезбонлигида ўтаётган бокс бўйича аёллар ўртасидаги Жаҳон чемпионатининг 21 март, сешанба кунги баҳсларида уч нафар ўзбекистонлик боксчи рингга кўтарилди.

-48 кг вазн тоифасида Ўзбекистон шарафини ҳимоя қилаётган Фарзона Фозилова нимчорак финалда сербиялик Снежана Силжковичга қарши тўқнаш келди ва рақибига имкон қолдирмади (5:0).

-63 кг вазн тоифаси вакили Хадичабону Абдуллаева ҳам Сербия спортчиси Елена Яничиевичдан 5:0 ҳисобида устун келди.

Навбаҳор Ҳамидова (-66 кг) эса мезбонлар вакили Манжу Бамбория устидан ишончли ғалабани қўлга киритди (5:0).

Шу тариқа уч нафар ўзбекистонлик боксчи мусобақанинг чорак финалига йўлланма олди.