Туркияда зилзила қурбонлари сони 50 минг кишидан ошди
Туркиянинг жануби-шарқидаги вайронкор зилзила қурбонлари сони 50 096 нафарга етди, деб маълум қилди Туркия табиий офатларга қарши кураш ва фавқулодда вазиятлар бошқармаси (AFAD) раҳбари Юнус Сезер.
Мамлакатда зилзилалардан жабрланганларнинг умумий сони 107 минг 204 нафарни ташкил этмоқда. Сезернинг сўзларига кўра, зилзилалардан кейин минтақада 35 мингдан ортиқ қутқарувчи ишлаган.
6 февраль куни Туркияда 7,7 магнитудали зилзила содир бўлди. Ундан кейин бир қатор кучсизроқ афтершоклар кузатилди. Табиий офатдан кўрилган зарар 100 миллиард доллардан ошди.
Февраль ойи охирида Туркияда биноларнинг зилзилада қулаб тушиши бўйича текширувлар бошланди. 200 дан ортиқ одам қамалди, 1000 га яқин киши қўлга олинди. Мутахассисларнинг таъкидлашича, вайрон бўлган биноларнинг аксарияти сифатсиз материаллардан фойдаланган ҳолда ва қониқарсиз усуллар билан қурилган.
Ўзбекистон Туркиядаги зилзила маркази бўлган Ҳатай вилояти ҳудудида уй-жой, мактаб ва бир қанча объектлар қурмоқчи. Шавкат Мирзиёев Туркий давлатлар ташкилотининг навбатдан ташқари саммитидаги нутқида бу ҳақда маълум қилган.
