Украина президенти офиси раҳбари маслаҳатчиси Михаил Подоляк Россия президенти Владимир Путиннинг аннексия қилинган Мариуполга ташрифи ҳақида фикр билдирди. Подоляк саҳифасида тегишли твит қолдирди.
“Жиноятчи ҳар доим жиноят содир бўлган жойга интилади. Цивилизациялашган дунё мамлакатлари ‘уруш режиссёри’ (Путин) чегарани кесиб ўтса, ҳибсга олинишини эълон қилаётган бир пайтда, минглаб Мариупол оилаларининг қотиллик ташкилотчиси шаҳар вайроналари ва оммавий қабрларни томоша қилиш учун келди”, — дейди Подоляк.
Украина Мудофаа вазирлиги “Путин худди ўғридек тунда Мариуполга ташриф буюрганини” қайд этади.
“Тун фақат у хоҳлаган нарсани кўрсатишга имкон беради, бунинг ортидан мақсадли аудитория Россия армияси томонидан бутунлай вайрон қилинган шаҳарни кўрмайди”, — дейилади вазирлик баёнотида.
Ўз навбатида, халқ депутати Алексей Гончаренко Путин ҳақиқатан ҳам Мариуполда бўлганми, дея муносабат билдирган. У Россия оммавий ахборот воситалари томонидан эълон қилинган кадрларда Путин йўлдан чиққан машиналарга йўл бергани, одатда бунинг тескариси бўлишини айтди. Депутат шаҳарда комендантлик соати жорий қилингани, кадрларда эса Путинни кечқурун одамлар кутиб олганини таъкидлаган.
Ғарб оммавий ахборот воситалари Украинанинг босиб олинган Қрим ва Мариупол ҳудудларига ташрифини Россия президентининг уни ҳибсга олишга ордер берган Халқаро жиноий судга жавоб деб атамоқда. Яқин келажакда ҳибсга олиш эҳтимоли ниҳоятда паст бўлса-да, Путин ўзининг ҳибсга олиниши ҳақидаги ордерга изоҳ бермади.
Путиннинг Мариуполга ташрифи
Россия президенти Владимир Путин 19 март куни Мариуполга боргани ҳақида маълумот берилди. У шаҳарга вертолётда етиб борган, сўнг машина ҳайдаб, ора-орада тўхтаган ҳолда шаҳар туманлари бўйлаб айланган. Путин у ерда бир неча объектларни кўздан кечириб, маҳаллий аҳоли билан суҳбатлашган.
Изоҳ (0)