Ўзбекистон 2022 йилда янги олма импортини кескин оширган. Хориждан олма сотиб олиш йил давомида 2,5 баробарга ошган ва рекорд даражадаги 26 700 тоннага етган. Бу ҳақда EastFruit хабар бермоқда.
Ўзбекистон импортчилари 2022 йилда Эрондан олманинг асосий ҳажмини харид қилди — 15 700 тоннадан ортиқ. Эроннинг ўзи 2022 йилда ҳосил етишмаслиги сабабли олма экспортининг умумий ҳажмини кескин қисқартирган бўлса ҳам Ўзбекистонга олма етказиб бериш 3,7 баробарга кўпайди.
Ўзбекистон бозорига олма етказиб берувчилар рейтингида иккинчи ўринда Польша бўлиб, унинг ҳиссасига барча импортнинг 15 фоизи ёки 4 100 тонна олма тўғри келади. Польшадан Ўзбекистонга етказиб бериш энг кескин ўсди — 2021 йилга нисбатан 41 баробар.
Россия бошлаган уруш ва Ўзбекистонга логистика нархи кескин кўтарилганига қарамай, Украина ҳам Ўзбекистонга олма экспортини сезиларли даражада оширди — 7,7 баробар кўпайиб, 2 200 тоннага етди.
Бу Украинага Молдовадан олдинга ўтиб кетишга имкон берди, у етказиб беришнинг атиги 67 фоизга — 2 000 тоннагача оширди.
Туркия Ўзбекистон бозорига йирик олма етказиб берувчилар орасида бешинчи ўринни эгаллади ва унинг олма етказиб бериш ҳажми йил давомида деярли ўзгармади — 1100 тонна.
2022 йилда Ўзбекистонга олма импорти географиясининг сезиларли ўсиши эътиборга молик. Юқорида санаб ўтилган мамлакатлардан ташқари, Хитой, Қозоғистон, Тожикистон, Литва, Қирғизистон, Россия, Озарбайжон, Франция, Венгрия, Латвия, Нидерландия каби мамлакатлардан ҳам янги олма улгуржи ҳажмлари етказиб берилди.
Ўзбекистон олманинг асосий ҳажмини февраль, март ва апрель ойларида импорт қилади, шундан сўнг мамлакат жанубий вилоятларидан янги ҳосилнинг маҳаллий бозорга чиқарилиши натижасида импорт кескин камаяди.
Изоҳ (0)