Қашқадарёда тупроқ кўчкиси сабаб поездлар ҳаракати тўхтатилди 

Қашқадарё вилоятида 9 февраль куни тупроқ кўчкиси содир бўлгани сабабли поездлар ҳаракати тўхтатилди. Бу ҳақда “Ўзбекистон темирйўллари” АЖ ахборот хизмати хабар берди. 

Хабарга кўра, 9 февраль куни соат 06:10 да Чашма-Оқработ станциялари оралиғининг 103-км 5-6 пикет қисмида тупроқ кўчкиси  содир бўлди. Шу сабабли поездлар ҳаракати вақтинча тўхтатилди. Қайд этилишича, ҳозирги пайтда ҳолатни бартараф этиш мақсадида мутахассислар тезкорлик билан ушбу ҳудудга етиб келди ва 3-дона экскаватор, 7-дона самосвал, 2-дона бульдозер ва бошқа техникалар жалб этган холда тупроқ кўчкиларини темирйўл изидан тозалаш ишлари амалга оширилмоқда.

Шунингдек,  2023 йилнинг 9 февраль куни 80/79-сонли Тошкент—Термиз—Тошкент ва 682/681-сонли Қумқўрғон—Сариосиё—Қумқўрғон йўналишларидаги поездлар ҳаракати техник сабабларга кўра бир рейсга тўхтатилади.