Ўзбекистонда Корея университети таълим стандартлари асосида шифокор ва ҳамширалар тайёрлаш, соҳа мутахассислари малакасини ошириш, илмий тадқиқотлар олиб бориш йўлга қўйилади. Бу ҳақда Соғлиқни сақлаш вазирлиги ахборот хизмати хабар берди.
Хабарга кўра, соғлиқни сақлаш вазири Амрилло Иноятов ва Корея университети президенти Жин Те Чанг бошчилигидаги делегация вакиллари билан мулоқот бўлиб ўтди. Таъкидланишича, Корея университети билан “Тошкент тиббиёт академиясида соғлиқни сақлаш соҳасида таълимни такомиллаштириш”га оид халқаро илмий грант доирасида ҳамкорлик қилиб келинмоқда. Шу асосда академияда “Атроф-муҳит ва инсон саломатлиги” кафедраси ҳамда замонавий илмий марказ ташкил этилиб, илғор лаборатория асбоб-ускуналари билан жиҳозланган. Ҳар икки лойиҳа атроф-муҳитдаги зарарли ва хавфли моддаларни ўрганиб, уларнинг аҳоли ҳамда ишчилар саломатлигига таъсирини баҳолашга қаратилган.
Қайд этилишича, мулоқотда делегация вакиллари тиббий таълим йўналишида қўшма дастурларни амалга ошириш, хусусан, Корея университети таълим стандартлари асосида шифокор ва ҳамширалар тайёрлаш, соҳа мутахассислари малакасини ошириш, илмий тадқиқотлар олиб бориш борасида ҳамкорлик алоқаларини кенгайтиришга тайёр эканлигини маълум қилди. Тошкент тиббиёт академиясида бўлиб ўтган тақдимот якунида Корея университети президенти Жин Те Чангга академиянинг “Фахрий профессори” унвони топширилди. Ўз навбатида, томонлар ўртасида Англашув меморандуми имзоланди.
Изоҳ (0)