Россия ва Эрон расмийлари Россия таркибидаги Татаристон республикасининг Елабуга шаҳрида Эроннинг Shahed-136 камикадзе дронларини ишлаб чиқарувчи завод қуриш имкониятини кўриб чиқмоқда. Бу ҳақда The Wall Street Journal хабар берди.
Нашр манбаларига кўра, 5 январь куни Эрон делегацияси республикага ташриф буюриб, у ердаги қурилиш учун мўжалланган жойни кўздан кечирган.
WSJ суҳбатдошларининг айтишича, ҳозирда Москва ва Теҳрон Shahed-136 камикадзе дронининг такомиллаштирилган моделини ишлаб чиқмоқда, у янада узоқроқ ва тезроқ уча олади. Томонлар Татаристондаги заводда йилига камида 6 минг дона дрон ишлаб чиқаришни режалаштирмоқда.
RF Мудофаа вазирлиги Украина энергетика тизими объектларига зарба бериш учун Эронда ишлаб чиқарилган Shahed-131/136 камикадзе дронларидан (Россияда уларнинг номи “Геран-1” ва “Геран-2” га ўзгартирилган) фаол фойдаланмоқда. WSJ таъкидлаганидек, Украина Қуролли кучларининг ҳаво мудофааси Shahed-136 таҳдидини етарлича зарарсизлантиришга муваффақ бўлди.
Россия ўз ҳудудида Эрон дронларини ишлаб чиқаришни режалаштираётгани ҳақида The Washington Post газетаси кузда хабар берганди. Нашрнинг ёзишича, Россия ва Эрон расмийлари ишлаб чиқариш бўйича 2022 йил ноябрь ойи бошида келишувга эришган.
Январь ойи бошида Украина Миллий хавфсизлик ва мудофаа кенгаши котиби Алексий Данилов Россияда дронларни ишлаб чиқариш Толятти шаҳрида ташкил этилиши мумкинлигини айтди. Шунингдек, у россияликлар бошқа шаҳарларни ҳам кўриб чиқаётганини таъкидлади.
Изоҳ (0)