Соғлиқни сақлаш вазири: Таълимда ўзгариш қилмас эканмиз, тиббиёт ҳам ўзгармайди

Тиббиётдаги ўзгаришлар таълим тизими билан бевосита боғлиқ. Бу ҳақда Соғлиқни сақлаш вазири Амрулло Иноятов Наманганда бўлиб ўтган матбуот анжумани давомида маълум қилди, дея хабар беради “Дарё” мухбири Азизбек Абдувалиев.

“Таълимда ўзгариш қилмас эканмиз, тиббиёт ҳам ўзгармайди. Буни 20 йил давомида тиббий таълим соҳасида ишлаган мутахассис сифатида айтяпман. Дунёда ҳамшираликнинг ўзини 50 дан ортиқ йўналиши бор. Тор йўналишлар, қўшма таълим дастурларига эътибор қаратишимиз зарур. Хусусан, радиология, биотехнология каби йигирмага яқин соҳада бакалавриат йўналишлари бизда ҳали-ҳануз мавжуд эмас”, — деди Амрулло Иноятов.

Матбуот анжумани давомида наманганлик журналистлар тиббий таълим муассасаларида ўқиш истагида бўлган, бироқ бунга имконияти йўл бермаётган ёшларнинг таҳсил олишларига кўмаклашиш учун вазирнинг нечоғли ваколатли эканлиги билан қизиқди. Иноятов ҳудудда шифокор ва ҳамшираларга бўлган эҳтиёждан келиб чиқиб, бу масалада амалий ёрдам кўрсатишга тайёр эканлигини билдирди.