Осиёнинг энг бой миллиардерлари рўйхати етакчиси ўзгарди

Ҳиндистонлик миллиардер Гаутам Адани “корпоратив фирибгарлик” айбловлари ортидан Аdani Group компаниялари акциялари тушиб кетгани сабабли Осиёнинг энг бой тадбиркори мақомини йўқотди. Бу ҳақда Forbes Real-Time маълумотларида қайд этилди. 

Бир кун давомида Гаутам Аданининг бойлиги яна 14 млрд долларга камайди ва 74,7 млрд доллар бўлиб турибди. 

Осиёдаги энг бой одам эндиликда нефтни қайта ишлаш, чакана савдо ва телекоммуникация соҳасида бойлик орттирган яна бир ҳиндистонлик миллиардер Мукеш Амбани ҳисобланади. 

Унинг капитали 83,6 миллиард долларга баҳоланган. Юқори учликка, шунингдек, 69,3 миллиард доллар бойлиги билан хитойлик тадбиркор Чжунг Шаншан (шишали сув компанияси эгаси) кирган.

1 февраль, чоршанба куни Мумбай биржасида Аdani Group флагман компанияси Аdani Enterprises акциялари 28,2 фоизга арзонлашди.

24 январгача Адани Forbes’нинг дунёнинг энг бой одамлари рейтингида учинчи ўринда эди. Ўшандан бери унинг бойлиги деярли 50 миллиард долларга камайди.

Қисқа савдога ихтисослашган Hindenburg Research инвестиция тадқиқот компанияси ҳисоботи эълон қилинганидан кейин инвесторлар Аdani Group компанияларининг қимматли қоғозларини оммавий равишда сота бошлади. 

У 24 январь куни эълон қилинган ва унда Аданининг компанияларида бир нечта корпоратив ҳуқуқбузарликлар ҳақида батафсил маълумот берилган.

Адани ушбу ҳисоботни “обрўга путур етказиш” ва акцияларга бўлган талабни камайтиришга қаратилган “нотўғри маълумотлар” деб атади. 

413 бетлик раддияда Аdani Group айбловларни “фақат бирон бир компанияга асоссиз ҳужум эмас, балки Ҳиндистонга қасддан қилинган ҳужум” дея рад этган.  

Hindenburg Research бунга жавобан Аdani Group’ни Ҳиндистон байроғини ниқоб сифатида ишлатиб, “миллатни тизимли равишда талон-тарож қилишда” айблаган.