Ўзбекистон 2022 йилда картошка сотиб олишни камайтирди. Маҳаллий етиштириш эса ошган 

2022 йилда Ўзбекистонда 3,4 миллион тоннадан ортиқ картошка етиштирилди, бу ўтган йилнинг шу даврига нисбатан 4,8 фоизга кўп. Бу ҳақда EastFruit хабар бермоқда. 

Мамлакат статистика бошқармасининг дастлабки маълумотларига кўра, 2022 йилда Ўзбекистонда умумий картошка етиштириш кўрсаткичи 3,44 млн тоннани ташкил этиб, 2021 йилга нисбатан 156,1 минг тоннага кўпайган. 

2022 йил июль ойи ўрталаридан бошлаб Ўзбекистонда улгуржи картошка нархлари барқарор бўлиб, анча тор нарх оралиғида ўзгариб турди. Нархлар мониторинги маълумотларига кўра, ушбу маҳсулотларнинг ўртача улгуржи нархи 2022 йил 15 июлдан 31 декабргача бўлган даврда 4 000 — 4 500 сўм/кг оралиғида бўлган. 

2023 йил январь ойида Ўзбекистонда картошканинг улгуржи нархлари ушбу минтақадаги аномал совуқ сабаб юқорилади — 6—20 январь оралиғида 4 000 сўмдан 5 000 сўм/кг гача. 

Бироқ сўнгги бир ҳафта ичида ушбу маҳсулотлар нархи пасайган ва 2023 йил 27 январь ҳолатига кўра, мамлакатда картошканинг ўртача улгуржи нархи 4 500 сўм/кг ни ташкил этган бўлиб, бу ўтган йилнинг шу санасига нисбатан 10 фоизга пастдир.

Картошка мева-сабзавот сегментида мамлакатнинг энг йирик импорт қилувчи маҳсулотидир. 2022 йил охирига келиб, Ўзбекистон сотиб олган картошканинг умумий ҳажми 515-525 минг тонна оралиғида бўлди ва 2021 йилги рекорд кўрсаткичга нисбатан 4-6 фоизга кам бўлди. 

Ўзбекистонда 2022 йил охиригача картошкани олиб кириш ва сотишда қўшилган қиймат солиғи солиғи нолга тенг бўлган.