Британия—Австралия тоғ-кон компанияси Рио Тинто Ғарбий Австралияда ичида радиоактив цезий-137 нуклиди бўлган капсулани йўқотиб қўйди. 30 январь куни компания бунинг учун узр сўраб чиқди.
Капсула диаметри 6 миллиметр ва узунлиги 8 миллиметр бўлган металл цилиндр. У темир рудаси зичлигини ўлчайдиган датчикнинг бир қисми эди. Капсула Рио Тинто конидан Ғарбий Австралия пойтахти Перт шаҳрига олиб кетилаётган вақтда тушиб қолган. Тахминларга кўра, капсула кон ва Перт ўртасидаги катта йўлга тушган. Уларнинг орасидаги масофа 1300 километрдан ошади.
Капсуланинг йўқолганини 25 январь куни — датчик Пертга олиб келинганидан бир ҳафтадан кўпроқ вақт ўтгач сезиб қолишган. Расмийлар ғарбий австралияликларни воқеа ҳақида огоҳлантирди ва агар капсулани кимдир топиб олса, ундан камида беш метр узоқликда туришни сўради, чунки цезий-137 терига тегса куйиш ва нурланиш хавфини туғдиради.
Ғарбий Австралия ёнғин ва қутқарув департаменти капсулани қидиришни бошлаган. Қидирув гуруҳи радиация даражасини ўлчайдиган асбобларни ўзи билан олган. Бироқ расмийлар капсула шоссе бўйлаб кетаётган ҳар қандай машина шинасига тиқилиб қолиши ва ҳайдовчи ва йўловчиларни радиация таъсирига тушириши мумкинлигидан хавотирда, деб ёзади The Wall Street Journal.
Изоҳ (0)