“Ўтган йил давомида ички ишлар ходимлари билан боғлиқ 644 та салбий видео тарқалган” — Шоҳрух Ғиёсов
“Дарё” интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда “Маҳалла. Муаммо. Мулоҳаза” лойиҳасини тақдим этиб келмоқда. Лойиҳанинг 16-сони мавзуси “Ички ишларнинг ички ишлари” бўлиб, дастур меҳмони сифатида ИИВ матбуот котиби Шоҳрух Ғиёсов таклиф этилди.
— Менга доим ходимларнинг ёнини оласиз, деб айтишади. Менинг ўзим ҳам, турмуш ўртоғим ҳам ходим. Шунинг учун барча ходимлар юқори савияли бўлишига ҳаракат қиламан. Кўп ҳолларда ахборот нохолис тарқатилади. Масалан, блогерлар саҳифасидаги айрим видеоларда кўрасиз: ходим югуриб бориб бир одамни уриб йиқитяпти-да, остида ходим фуқарони уряпти, деб изоҳ ёзилади. Лекин биладиган одам кўрса англайдики, бу аслида куч ишлатиш орқали қўлга олиш бўлиб чиқади. Видеонинг тўлиқроқ қисмини олиб қарасак, ходим суднинг мажбурий ижросини таъминлаш учун фуқарони олиб кетмоқчи, лекин у бўйсунмаяпти, жанжал кўтариб, бақир-чақир қилиб қочиб кетяпти. Ходим аввалига уни огоҳлантиряпти, фуқаро қонун талабини бажармаганидан сўнггина куч ишлатяпти. Бу — қонуний фаолият. Шундай ходимларнинг ёнини олиш керак.
Ходимни куч ишлатди, урди деб шунақа ҳолатда видеога олишади. Лекин тасаввур қилинг, у 8 соат кўчада турибди, ҳар хил одамлар билан гаплашади, асабийлашади. Журналистлар камера қаршисида бемалол гаплаша олар, лекин ички ишлар ходимлари ўзини ноқулай ҳис қилади, ҳаяжонланади, шу пайтда тўғри келмайдиган гап айтиб қўйиши мумкин. Тасвирга олиб ижтимоий тармоқларга жойлаб юборишади. Ходимнинг ҳам оиласи, таниш-билиши бор, ноқулай бўлиши табиий. Албатта, бундай ходимларнинг тарафини олишимиз керак.
Ўтган йил давомида ички ишлар ходимлари билан боғлиқ бўлган 644 та салбий видео тарқалган. Шунақа видеоларни кўриб, хизмат текшируви ўтказамиз, муносабат бериш-бермаслигимиздан қатъи назар, ҳар бир ҳолатга реакция билдирамиз. Доим ҳам ходимларнинг ёнини олмаймиз, агар айбдор бўлса, жазолаймиз.
Бир томондан, тарқалаётган видеолар бизга ёрдам, чунки ходимнинг биз бехабар қолган хатоларини ижтимоий тармоқлар кўрсатиб беради. Бунинг оқибатида, ўтган йили айнан ижтимоий тармоқларда чиққан маълумотлар бўйича 139 та хизмат текшируви тайинланган. Шу ҳолатларда 45 нафар ходимни интизомий жазолаганмиз, улардан 13 нафари эгаллаб турган лавозимидан озод этилган, бир нафари умуман ички ишлар органларидан бўшатилган. 75 та ҳолатда ходимлар айбсиз деб топилган. Шу билан бирга, ижтимоий тармоқлардаги ахборотлар бўйича 277 та ҳолатда ходимлар рағбатлантирилган, — таъкидлади Шоҳрух Ғиёсов.
Кўрсатувни тўлиқ тарзда “Дарё”нинг YouTube’даги саҳифаси орқали томоша қилиш мумкин.
