“Фильмларда ички ишлар ходимини доим яхши қилиб тасвирлаш эмас, ёмонларини ҳам кўрсатиш керак” — Шоҳрух Ғиёсов
“Дарё” интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда “Маҳалла. Муаммо. Мулоҳаза” лойиҳасини тақдим этиб келмоқда. Лойиҳанинг 16-сони мавзуси “Ички ишларнинг ички ишлари” бўлиб, дастур меҳмони сифатида ИИВ матбуот котиби Шоҳрух Ғиёсов таклиф этилди.
— Фильм ва сериаллар жуда муҳим тарғибот йўналиши ҳисобланади. Матбуот хизматига келишимдан аввал телевидениеда ИИО билан боғлиқ сериал ёки кинолар кўрсам, буларнинг консултанти йўқми, деб ҳайрон қолардим. Ҳақиқий ички ишлар ходими ўзини бундай тутмайди ёки бунақа тарзда гапирмайди, дердим. Кейин Кинематография агентлиги ва бошқа хусусий компаниялар билан меморандум туздик. Мана, 2 йил бўлди, “Патрул” сериалини йўлга қўйдик, бундан ташқари, “Изқувар” номли сериалимиз ҳам бор.
Кинематография агентлиги билан фильм ижодкорларининг орасида ҳам ташкилий, молиявий муаммолар бор экан. Улар шахсий таркибни ташкил қилиш, ИИОга тааллуқли транспорт воситалари билан таъминлаб бериш, жанговар саҳналар учун махсус куч хизматлари ёки ЙТHgа учраган машиналарни етказиб бериш борасида биздан ёрдам сўрашди.
Тўрахўжаев Сайфиддин исмли 23 йиллик стажга эга ходимимиз бор, веб-ресурслар бўйича бўлим бошлиғи лавозимида ишлайди. Айнан кинематография бўйича уни консултант қилиб белгилаб қўйдик. Киночилар бизга сценарий беришади, у ўрганиб чиқиб, керак бўлса, тасвирга олиш жараёнида ҳам қатнашади, техник ва ташкилий масалаларга ёрдам беради. Актёрларни саралаш жараёнида ҳам қатнашади, фильм ҳаётий чиқиши учун рол ижрочиси айтадиган гаплари, ўзини тутиши борасида маслаҳат беради.
Айрим ташкилотчилар бизга айтишади: “Агар ички ишлар ходимини ёмон қилиб кўрсацак, бу кино тасдиқдан ўтмайди”, — деб. Йўқ, бу ҳаёт-ку, ходимлар орасида порахўрлари, ғаразлилари, муҳитни бузадиганлари бор, шуларни ҳам ҳаётий қилиб кўрсатиб беришимиз керак. Мана ҳозир 15 тача сценарий устида ишланяпти, — дея маълум қилди ички ишлар вазирлиги матбуот котиби.
Кўрсатувни тўлиқ тарзда “Дарё”нинг YouTubeъдаги саҳифаси орқали томоша қилиш мумкин.
