27 январь куни эрталаб Теҳрондаги Озарбайжон элчихонасида отишма содир этган эркак буни оилавий сабабларга кўра қилган. У ярим йилдан ортиқ вақтдан бери бедарак кетган рафиқасини шу дипломатик ваколатхона биносида деб ўйлаган. Эрон оммавий ахборот воситалари ҳуқуқ-тартибот идораларига таяниб, дастлабки тергов давомида аниқланган маълумотларни чоп этди.
“2022 йилнинг апрель ойида рафиқам Теҳрондаги Озарбайжон элчихонасига кетганича, уйга қайтмади. Элчихонага қайта-қайта келдим, лекин улардан ҳеч қандай жавоб олмадим. Мен рафиқам Озарбайжон республикасининг Теҳрондаги элчихонасида бўлиб турибди, мен билан учрашишни истамаяпти, деб ўйладим. Бугун эрталаб аввалдан тайёрлаб қўйган Калашников автомати билан элчихонага боришга қарор қилдим”, — дея ҳибсга олинган шахснинг сўзларини келтиради Асриран газетаси.
Тергов бошиданоқ эркак ҳужум сабабини шахсий ва оилавий муаммолар билан изоҳлаганди. У элчихона биносига икки нафар ёш боласи билан кирган.
Эслатиб ўтамиз, 27 январь куни Теҳрондаги Озарбайжон элчихонасига қуролли ҳужум уюштирилди, оқибатда дипломатик миссиянинг қўриқлаш хизмати раҳбари ҳалок бўлди, яна икки қўриқчи яраланди. Кейинроқ ҳужум лаҳзалари акс этган видео эълон қилинди.
Ҳужум юзасидан тергов бошланган.
Изоҳ (0)