Микротўлқинли печда ўнлаб таомларни пишириш мумкин, лекин, қоида тариқасида, ундан битта мақсадда фойдаланишади: шунчаки овқат иситиш. Аммо мўъжизага бой шундай қулай ошхона гаджети бўлса, таом иситиш билан чекланиб бўладими? «Новий очаг» нашри микротўлқинли печдан фойдаланишда кўпчиликка номаълум бўлган қулайликларни санаб ўтди.
Кўпроқ шарбат олиш мумкин
Бу лайфхак фақат лимон билан эмас, балки барча цитрус мевалари билан иш беради. Лимон микротўлқинли печга қўйилади, сўнгра шарбати сиқиб кўрилади. Мевалар бу усулда кўпроқ шарбат беради ва бунинг учун ортиқча куч сарфлаш шарт эмас. Фақат мева микротўлқинли печда узоқ вақт қолмаслиги керак. Атиги 15 сония етарли бўлади.
Қаттиқ қовоқни осон тозалаш мумкин
Қовоқ микротўлқинли печга 10 сонияга қўйилади, шунда пўстини пичоқ билан тезроқ тозалаш мумкин. Қовоқча, бақлажон ва бошқа қаттиқ пўстли сабзавотларни ҳам шундай тозалаш мумкин.
Пиёзни кўз ёшларсиз тўғраб олинг
Микротўлқинли печда 30 сония давомида пиёз олдиндан қиздирилади. Иссиқлик кўзнинг ёшланишига олиб келадиган кимёвий моддаларни парчалайди. Сўнгра пиёзни кўз ёшларсиз тўғраш мумкин.
Ловияни узоқ вақт сувда ивитмасдан пишириш мумкин
Ловия, нўхат, ясмиқ каби маҳсулотлар узоқ вақт сувда ивитишни талаб қилади. Худди шу жараённи микротўлқинли печ тезлаштиришга ёрдам беради: ловия сувга солинади, бир чимдим истеъмол содаси қўшилади ва 7-10 дақиқа давомида печга қўйилади. Кейин пиширишдан олдин яна ярим соат сувда қолдирилади.
Эскирган нонни қайта юмшатиш мумкин
Тоза ошхона сочиғи илиқ сувга ботирилиб, нон ўралади. Микротўлқинли печга 20 сонияга қўйилади, эскирган нон яна юмшайди. Фақат нонни илиқлигидаёқ истеъмол қилиш керак, акс ҳолда яна қаттиқ ҳолатга келиб қолади.
Асални эритиб олиш мумкин
Асал эритиб олиш учун микротўлқинли печга қўйилади. Ўртача қувватда 30-40 сония давомида қиздирилади. Аниқ вақт жиҳознинг кучига ва асал миқдорига қараб фарқ қилиши мумкин. Кейин асал олиниб, яхшилаб аралаштирилади.
Лавлагини тезроқ пишириш мумкин
Ювилган ва тозаланмаган лавлаги пакетга солинади ва микротўлқинли печда 15 дақиқа давомида қиздирилади. Сўнгра олиниб, пакет ичида 5 дақиқа қолдирилади.
Помидорни осонгина тозалаш мумкин
Помидорнинг пўстини тозалаш учун устига қайноқ сув қуйишга одатланганмиз. Лекин буни тезроқ бажариш мумкин. Бунинг учун помидор ювилади. Помидорнинг таги кесиб қўйилади ва сувли идишга солиб, печга қўйилади. Сув бир зумда буғланиб, помидорнинг пўстини тозалашни осонлаштиради.
Ликоп ёки кружкани иситиб олинг
Қимматбаҳо ресторанларда овқатни кўпроқ иссиқ туриши учун иситилган ликопчаларда берилишини биласизми? Совиганда таъмини йўқотадиган баъзи таомлар учун бу зарурдир. Агар кружка олдиндан қиздирилса, қаҳва ва чой ҳам тезда совиб кетмайди.
Ёнғоқ ва уруғларни қовуриш мумкин
Ёнғоқлар ювилади ва қуритилади, 5-6 дақиқа давомида максимал қувватда микротўлқинли печга қўйилади. Давомийлиги ёнғоқлар миқдорига боғлиқ: қанча кўп бўлса, шунча кўп вақт талаб этилади. Ёнғоқларни бир-икки марта чиқариб, аралаштириш мумкин, шунда улар бир текисда қовурилади.
Кўкатларни қуритиш мумкин
Сўлиб қолган кўкатларни микротўлқинли печда бир неча дақиқада қуритиш мумкин. Бироз вақт ўтгач уларни идишларга солиб, жавонларда сақлаш мумкин.
Косметик ёғларни қиздириш мумкин
Соч ёки массаж учун мўлжалланган ёғни ишлатишдан олдин бироз қиздириш тавсия этилади. Бундай ҳолда идиш микротўлқинли печда 20 сония давомида қиздирилади.
Қуриб қолган тушни юмшатиш мумкин
Микротўлқинли печ қуриб қолган тушни юмшатишга ёрдам беради. Фақат қадоқ олдиндан текширилади, у бутунлай пластик бўлиши керак. Туш қопқоғи очилади ва микротўлқинли печга қўйилади ва унинг ёнига ярми сув билан тўлдирилган стакан қўйилади. Кам қувватда 30-40 сония давомида қиздирилади.
Ошхона сочиқларидан ёқимсиз ҳидни кетказиш мумкин
Агар ошхона сочиқлари ва салфеткалардан ёқимсиз ҳид келса, улар илиқ сувда намланади, доғлар кир совуни ёки лимон кислотаси билан ювилади. Сўнгра пакетга солиниб, микротўлқинли печга қўйилади. Юқори қувват ёқилиб, 1,5-2 дақиқага қолдирилади. Печдан сочиқлар эҳтиёткорлик билан олиб ташланади, совуқ сувда ювилади ва қуритиш учун осиб қўйилади.
Идишларни стерилизация қилиш мумкин
Ҳар бир банкага бироз қайнатилган сув қуйиб, микротўлқинли печга 2-3 дақиқа қўйилади. Сўнгра идишлар олиниб, сув тўкиб ташланади ва тўлиқ қуригунча банкалар қоғоз сочиқлар устида қолдирилади.
Изоҳ (0)