Испания бош вазири Педро Санчес фикрича, Европа мамлакатларида Россия ҳукуматининг яширин тарафдорлари бор, улар Москвага нисбатан майлларини сир тутмоқда. Испания бош вазири Кремлнинг Европадаги махфий агентларига қарши курашишга чақирди, деб ёзади La Vanguardia.
«Россия автократи (ҳокими мутлақ) дунёни парчалаб ташлаш ва вақтни орқага қайтариш бўйича жаҳолатли интилишларида ёлғиз эмас. Унинг Европада иттифоқчилари кўп, улар ҳозир Путинга нисбатан майлларини яширмоқда, аммо бир йилгина аввал уни зиёрат қилиб, унинг услубларини кўкларга кўтара эди», — деди Санчес Давосдаги Жаҳон иқтисодиёт форумида.
Украинада ҳарбий операция бошланганидан кейин Италия собиқ бош вазири Сильвио Берлускони Владимир Путин билан алоқаларда айбланган эди. 24 февралга қадар Россия ва Италия сиёсатчилари кўп марта учрашган ва ўзларини дўстлар деб атаган эди. Апрелда Сильвио Берлускони Россия президентининг қарорини қоралади. Бироқ 2022 йил октябрида Берлускони Путин билан муносабатлари қайта тикланганини маълум қилди. Унинг сўзларига кўра, Владимир Путин, гўёки, унинг 86 ёшига атаб бир неча шиша водка совға қилган. Кейинроқ Берлускони бу воқеани ҳазил деб атади.
Россия билан алоқаларда Германия киберхавфсизлик агентлиги раҳбари Арне Шенбом ҳам айбланган эди. У «Германия киберхавфсизлик бўйича кенгаши» бирлашмаси орқали Россия махсус хизматлари билан алоқаларда гумонланган. Бироқ далиллар бўлмагани туфайли, ундан айбловлар олиб ташланган ва у янги лавозимга тайинланган эди.
Изоҳ (0)