Тошкент вилояти ҳокими Зоир Мирзаев президент Шавкат Мирзиёев вилоят ҳокимлари фаолиятини, уларнинг ижтимоий тармоқлардаги саҳифалари-ю, интернетда ҳокимларнинг камчиликлари ҳамда ютуқлари ҳақида диққат билан ўқиб боришини, бу ҳақда катта селекторларда шахсан президентнинг ўзи гапиришини маълум қилди.
Президентимиз катта селекторларда фаолиятимизни кузатаётганликларини айтади. Барча ҳокимларни диққат билан кузатиб, камчилик ва ютуқларимизни, яхши ва ёмон ҳолатлар ҳақида, албатта, фикр билдиради, — дейди Тошкент вилояти ҳокими Зоир Мирзаев.
Тошкент ҳокими «Дарё» журналистининг «Онлайн эфир орқали сайёр қабул ўтказиш амалиётингиз президентга қай даражада маъқул келди. Бу ҳақда президентнинг шахсан ўзлари фикр билдирдими?», — дея берилган саволга ҳам жавоб берди.
Онлайн эфир борасида президентимиз катта селекторда фикр билдириб, кузатишларини айтган, албатта. Нега айнан онлайн эфир орқали халқ мурожаатларини ўрганишимиз ҳақида тўхталсак, кўпчилик кузатувчиларимиз биладики, ночор бўлмаган одам қабулга келиб моддий ёрдам сўраганида жонли эфирнинг ўзида буни рад қилганимизни кўраётган кузатувчилар изоҳлар орқали бизга ёрдам беради. Иккинчи томони биз шу онлайн эфир орқали сайёр қабулда кимгадир топшириқ беряпмиз буни жамоатчилик эшитиб туради, шунда топшириқ олувчи ҳам ўзимиз ҳам бунга янада масъулият билан ёндашамиз. Жонли эфир орқали қабулни кузатиб турган тўққиз минг нафар инсон олдида ваъда берган масъул буни бажарадими-йўқми халқ ўзи баҳо бериб боради, — дейди вилоят раҳбари Зоир Мирзаев.
Ҳоким онлайн эфирдаги сайёр қабулини кузатувчилар орасида ҳам бу ишга ишончсизлик билан қараётган, буни пиар учун деб баҳолаётганлар ҳам борлигини инкор этмади.
Тан олиш керак қилаётган ишларимизга бу кўзбўямачилик, пиар учун қилинаётган иш дегувчилар ҳам топилади. Буни ҳам доим кўрамиз ва кузатамиз. Изоҳ ёзиб, жавоб ҳам берамиз. Биз танқидий қарашларга ҳам қарши эмасмиз, аммо танқид экан дея ҳатто ўқишга уяладиган сўзларни ёзиш мусулмончиликка ҳам тўғри келмайди, журналист этикасига ҳам. Энди ўша сўзни ёзувчининг тарбиясига боғлиқ, албатта, — дейди ҳоким.
Тошкент ҳокимининг маълумот беришича, ҳокимнинг бир кунлик қабулида моддий ёрдамга муҳтожларга камида 350-400 миллион сўм маблағ сарфланади.
Ҳокимият тизимида ишлаётганимга 22 йил бўлган бўлса, охирги олти йилдагидек қўлимда маблағ бўлмаган. Маблағ йўқлигида одамларнинг олдига боролмайсиз ҳам. Кўчамни таъмирлаб бер деса, ёки уйимни таъмирлаб берса, нима дейман, нима деб жавоб бераман деб истиҳола қилиб, қочиб юрган пайтларимиз ҳам бўлган. Буни тан олиш керак, — дейди Тошкент вилояти ҳокими.
Зоир Мирзаев журналистлар билан мулоқотида, шунингдек, фаолияти давомида ижтимоий тармоқларда орқали берилаётган саволларга ва аҳоли изоҳларига шахсан ўзи жавоб беришини, бу иш билан асосан йўлда автомобилда кетаётган пайтда, қолаверса, ишдан қайтгач уйда шуғулланишини билдирди.
Машинада у жойдан бу жойга кетаётган пайтимда телефон орқали ижтимоий тармоқларни диққат билан кузатиб, берилаётган ҳар бир саволга, эътирозга шахсан ўзим жавоб беришга ҳаракат қиламан. Қолаверса, ишдан кейин уйга қайтганимдан сўнг ҳам кечаси 11 дан кейин бир-икки соат ижтимоий тармоқларни кузатиб, аҳоли томонидан берилаётган барча саволларга жавоб бераман, — деди Зоир Мирзаев.
Мавзуга доир:
- «Биз аввал маҳаллабай, кўчабай ва хонадонбай ишладик. Энди фуқаробай ишлашни бошладик» — Зоир Мирзаев
- «Ҳокимларни ёмон кўрувчиларнинг боласи ҳоким бўлсин». Зоир Мирзаев фуқаролар учун навбатдаги қабулида айрим мурожаатчиларга танбеҳ берди (видео)
- Зоир Мирзаев қабулида бўлган 88 ёшли отахон собиқ ҳоким томонидан ери олиб қўйилганини, бироқ компенсация берилмаётганини маълум қилди
- «Кучукнинг уйини тиллага тенглаштириб юборадиганлар бор» — Зоир Мирзаев
Изоҳ (0)