Ўзбекистон ва Қозоғистон президентлари Шайх Хованди Тоҳур ва Тўлабий мақбараларини зиёрат қилди

Қозоғистон президенти Қосим-Жўмарт Тўқаев Ўзбекистонга ташрифи доирасида Шавкат Мирзиёев билан биргаликда Тошкентдаги Шайх Хованди Тоҳур ва Тўлабий мақбараларини зиёрат қилди.

Президент матбуот хизматининг маълум қилишича, Қозоғистон раҳбари мақбаралар тарихи билан танишди, ободонлаштириш ишларини кўздан кечирди. Қуръон тиловат этилиб, дуо ўқилди.

Қосим-Жўмарт Тўқаев қардош халқларнинг умумий тарихий-маданий меросини асраб-авайлашга қаратилаётган эътибор учун Ўзбекистон президенти ва халқига миннатдорлик билдирди.

Маълумот учун, Шайх Хованди Тоҳур XIV асрда яшаган олим ва сўфий, Аҳмад Яссавий таълимотининг давомчиси бўлган. Инсонларни илм-маърифатга, етакчиларни тинчлик-аҳилликка чорлаган валий зот сифатида халқ хотирасида қолган.

Шайх мақбараси атрофи азиз қадамжога айланган. Хусусан, XVII асрда бу ерга Тўлабий дафн этилган. Қалдирғочбий деб ҳам аталадиган бу инсон қозоқ элининг бош қозиларидан ҳамда «Жети Жарғи» қонунлар тўпламининг тузувчиларидан бири бўлган.

Ёнма-ён жойлашган бу мақбаралар ўзбек ва қозоқ халқлари азалдан бирга яшагани, қардош-у ҳамфикр бўлганининг яна бир далолатидир.

Қозоғистон президенти Қосим-Жўмарт Тўқаев Шавкат Мирзиёев таклифига биноан 21 декабрь куни давлат ташрифи билан Ўзбекистонга келганди. Шу куни Қозоғистон етакчиси «Янги Ўзбекистон» боғига ташриф буюриб, анъанага кўра, Мустақиллик монументи пойига гул қўйди. «Кўксарой» қароргоҳининг Фахрий меҳмонлар хиёбонида дарахт экди.

Ташриф дастурига мувофиқ, 22 декабрь куни олий даражадаги музокараларда икки томонлама ва минтақавий аҳамиятга молик долзарб масалалар муҳокама қилинади. Саммит кун тартибидан Ўзбекистон—Қозоғистон стратегик шериклик ва иттифоқчилик муносабатларини янада чуқурлаштириш, ўзаро савдо ҳажмини ошириш, саноат кооперацияси бўйича ўзаро манфаатли қўшма лойиҳаларни илгари суриш, қишлоқ хўжалиги, транспорт ва логистика соҳаларидаги ҳамкорликни кенгайтириш, фаол ҳудудлараро ва маданий-гуманитар алмашинувларни давом эттириш каби асосий масалалар ўрин олган.

Мавзуга доир: Қозоғистон президентини тантанали кутиб олиш маросими бўлиб ўтди