Россия Украинадаги урушни қишда музлатиб қўйишга ҳаракат қилмоқда, бу эса ўз кучларини қайта тиклаш ва баҳорда янги ҳужумни бошлашга имкон беради. Бу ҳақда НАТО бош котиби Йенс Столтенберг Financial Times нашрига берган интервьюсида маълум қилди.
Столтенбергнинг сўзларига кўра, Россия урушни ҳеч бўлмаганда қисқа муддатга тўхтатиб қўйишга ҳаракат қилмоқда.
«Шунда улар қайта гуруҳларга бўлиниб, ҳарбий техникаларни тиклаб, кейинги баҳорда каттароқ ҳужум бошлашга ҳаракат қилиши мумкин», — дейди НАТО бош котиби.
У қишда Украинадаги жанговар ҳаракатлар тинчроқ фазага ўтишини прогноз қилди. Бироқ Украина ва Россия қўшинлари ўз кучларини қайта тўплаш ва қуроллантириш ниятидалиги, шу учун Ғарб иттифоқчилари Украинага ёрдам беришда давом этиши кераклигини айтди.
Столтенберг Россия ҳозирда тинчлик музокараларига тайёрлик кўрсатмаётганини ҳам қўшимча қилди. Унинг фикрича, Украинадаги уруш дипломатия йўли билан тугайди, лекин бунинг учун биринчи навбатда жанг майдонида ғалаба бўлиши керак.
«Кўпгина урушлар, хусусан, Украинадаги ҳам музокаралар столида тугайди, аммо бу столда нима содир бўлиши бутунлай жанг майдонидаги вазиятга боғлиқ», — дейди Йенс Столтенберг.
Мавзуга доир:
Изоҳ (0)