Навоий вилояти Томди туманида фуқаро мармар конига ниқоб тақиб кириб, босқинчилик содир этди. Бу ҳақда Тергов департаменти ахборот хизмати хабар берди.
Қайд этилишича, 28 ноябрь куни соат 23:00 да номаълум шахс ўзганинг мол-мулкини босқинчилик йўли билан қўлга киритиш мақсадида юзига қора рангли ниқоб кийган ҳолда Томди тумани ҳудудида фаолият олиб бораётган қўшма корхонанинг мармар кони қоровулхонасига бостириб кирган.
Шу ерда корхона қоровули — 55 ёшли Р.У.га ҳужум қилиб, унинг юз қисмига уриб, қўлларини арқон билан боғлаб, корхона омборхонаси қулфини бузиш йўли билан очган. Сўнг умумий қиймати 4 миллион сўмлик 35 миллиметр диаметрли, узунлиги 50 метр бўлган мис кабелларини босқинчилик йўли билан олиб, ҳодиса жойидан яширинган.
Олиб борилган тергов-тезкор ишлар натижасида «Янги Зарафшон» МФЙда яшовчи, туманда жойлашган ўрта мактабларнинг бирида қоровул бўлиб ишловчи 30 ёшли К.А. юзига ниқоб кийган ҳолда, давлат рақам белгиси бўлмаган «Урал» мотоциклида корхонанинг ҳудудига келиб, мазкур жиноятни содир қилгани аниқланиб, ушланган.
Ҳолат юзасидан Жиноят кодекснинг 164-моддаси 3-қисми «в» банди (босқинчилик) билан жиноят иши қўзғатилган. Ҳозирда юқоридаги шахс нима сабабдан ушбу жиноятга қўл ургани аниқланмоқда.
Изоҳ (0)