Тошкент вилоятида 10 сотих ер олиб бериш учун фуқародан 20 минг доллар олган шахс қўлга олинди

Тошкент вилояти Бекобод туманида ер майдони савдоси билан боғлиқ фирибгарлик ҳолати фош этилди, деб хабар бермоқда Иқтисодий жиноятларга қарши курашиш департаменти.

Қайд этилишича, Бош прокуратура ҳузуридаги департамент ҳамда ДХХнинг Бекобод шаҳар бўлимлари томонидан тезкор тадбир ўтказилган. Унда фуқаро Ғ.Ф. (муқаддам судланган) фуқаро М.С.нинг ишончига кириб, гўёки юқори лавозимда ишловчи танишлари ёрдамида «Й.Д.» фермер хўжалигига қарашли «Металлург» МФЙ ҳудудидаги 10 сотих ер майдонини унинг номига расмийлаштириб олиб беришини айтгани аниқланган. Ғ.Ф. хизмати эвазига 20 000 долларни олган вақтида ашёвий далиллар билан ушланган.

Ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилган. Ҳозирда тергов ҳаракатлари ўтказилмоқда.