АҚШ терма жамоаси матбуот хизмати ўз ижтимоий тармоқларида ЖЧ—2022 турнир жадвали суратини эълон қилди. Унда Эрон байроғи Ислом Республикаси рамзисиз тасвирланган эди.
Ушбу пост ижтимоий тармоқларда жиддий танқидларга сабаб бўлди, шундан сўнг Америка терма жамоаси вакиллари шов-шувли суратни олиб ташлади.
Кейинчалик АҚШ терма жамоаси матбуот хизмати ижтимоий тармоқларда Эроннинг расмий байроғисиз тасвирлаш қарорини «Эрондаги инсон ҳуқуқлари учун курашаётган аёлларни қўллаб-қувватлаш» деб тушунтирди хабар беради The Guardian нашри.
Эрон футбол федерацияси мамлакат шаънини камситгани учун АҚШ терма жамоасини 10 та ўйинга четлатишни сўраб, ФИФА тартиб-интизом қўмитасига шикоят хати йўллаган.
Эслатиб ўтамиз, сўнгги вақтларда Эронда давлат тузумига қарши намойишлар бўлиб ўтмоқда. Мамлакатда 22 ёшли Маҳса Аминийнинг ўлимидан сўнг иккинчи ойдирки, тартибсизлар, намойишлар ва тўнашувлар бўлиб ўтмоқда. Аминий Теҳронда ҳуқуқ-тартибот идораси ходими томонидан «ҳижобни нотўғри ўрагани» учун ҳибсга олинган ва бир муддат полиция бўлимида бўлганидан сўнг вафот этган. Ушбу ҳодиса мамлакатда норозилик ва тартибсизликларни келтириб чиқарди.
Изоҳ (0)