Уфада тўрт нафар талаба қўпорувчиликда айбланди. Медведев бунга жавобан ўлим жазосини қайтариш ҳақида фикр билдирди

Россия таркибидаги Бошқирдистон республикаси пойтахти Уфа шаҳрида тўрт нафар маҳаллий аҳоли гуруҳ таркибида теракт ташкиллаштиришда айбланиб, ҳибсга олинди, деб хабар бермоқда «Коммерсантъ» Уфанинг Совет туман судига таяниб.

Ҳибсга олинганлар 17—18 ёшли йигитлар бўлиб, айблов версиясига кўра, улар Россиянинг Украинага бостириб киришига қарши чиқиб, Бошқирдистонда ҳокимият органлари фаолиятини беқарорлаштириш мақсадида камида беш марта темир йўлдаги электр техникаси ускунасига зарар етказишга уринган.

Хусусан, йигитлар Черниковка — Шакша станциялари оралиғидаги ажратувчи постга ҳамда Дема — Блокпост станциялари оралиғида бошқарув пунктига ва тўртта реле шкафига ўт қўйган. 27 октябрь куни айбланувчиларнинг икки нафари Уфа темир йўлида ажратувчи постни ёқиб юборишга уриниш чоғида қўлга олинган.

Айбланувчиларнинг «ВКонтакте»даги саҳифаларига кўра, улар Уфа ўқув муассасалари талабаларидир. Баъзи манбалар улардан бири Тожикистон фуқароси эканини даъво қилмоқда.

Уфалик талабалар ишини Россия Хавфсизлик кенгаши раиси ўринбосари, мамлакат собиқ президенти ва бош вазири Дмитрий Медведев изоҳлади. У айбланувчиларни «чет эллик талабалар» ва «ярамаслар» деб атади, шунингдек, Иккинчи жаҳон уруши даврида «саботажчилар» (путур етказувчилар, тўсқинлик қилувчилар) отиб ташланганини эслатди.

«Замонавий Россияда ўлим жазосига мораторий (тақиқ) амал қилади. Бу ғоятда инсонпарварлик… Лекин, яна бир марта таъкидлайман, ҳозирги Конституция доирасида ҳам, Россия Конституциявий суди ҳуқуқий позициясини ўзгартиришда зарур бўлса, ўлим жазосига нисбатан мораторий енгиб ўтилиши мумкин. Бу одамларимиз, давлат ва жамият манфаатларини ҳимоя қилиш воситасини танлаш масаласидир», — дейилади Медведевнинг постида. У уруш бошланганидан кейин ўлим жазосини қайтариш ҳақида кўп марта фикр билдирган.

Ижтимоий тармоқлардаги профиллари ва суратларига қараганда, айбланувчилар болалигидан буён Уфада яшайди ва ўқийди. Уларнинг чет эл фуқаролари экани тасдиқланганича йўқ.

Аввалроқ бошқирд миллатчилари сафарбарликка жавобан ҳамда республиканинг Россиядан ажралиб чиқиши ҳақидаги шиорлар остида қуролли қаршилик ҳаракатини туза бошлагани хабар берилган эди.