Ижтимоий тармоқларда Андижон вилоятидаги мактабларнинг бирида ўқувчилар дарс пайтида тик ёқда тургани кўринган видео тарқалди. «Дарё» мухбирининг аниқлаштиришича, воқеа вилоятнинг Асака туманидаги мактабда содир бўлган.
Вилоят халқ таълими бошқармаси ахборот хизмати раҳбари Умархўжа Мадаминовнинг «Дарё»га маълумот беришича, ҳолат тумандаги 28-умумтаълим мактабида рўй берган.
Ижтимоий тармоқларда тарқалган видеода 28-умумтаълим мактаби ўқувчиларининг дарс машғулотларини якунлаб, тўгарак машғулотларини ўтаётгани тасвирланган. Бу пайтда ушбу хонада парталар алмашаётган бўлган, ҳолат эса тасвирга олинган. Видеотасвирда эса хонада жиҳозлар йўқдек кўриниш ҳосил қилган. Аслида ушбу таълим муассасасида парта ва стол-стуллар етарли,— дейди Умархўжа Мадаминов.Масъулнинг маълумот беришича, 28-мактаб биносида таъмирлаш ишлари кетаётгани боис, бу мактаб ўқувчилари вақтинча 29-мактаб биносидан фойдаланиб турган.
29-мактаб 2019 йилда фаолияти тугатилган Асака озиқ-овқат касб-ҳунар коллежи биносига кўчирилган. Бино 680 ўринга мўлжалланган бўлиб, ҳозирда муассасада 528 нафар ўқувчи таҳсил олмоқда. Ўқув хоналари мебель, ўқув лаборатория асбоб-ускуналари ҳамда спорт анжомлари билан тўлиқ таъминланган. Президентимизнинг 2022 йил 18 мартдаги «2022—2026 йилларда «Обод қишлоқ» ва «Обод маҳалла» дастурларини амалга ошириш чора-тадбирлари тўғрисида» қарорига асосан тумандаги 28-мактаб «Обод қишлоқ» давлат дастурининг капитал реконструкция режасига киритилган.Дастур асосида мактабнинг мавжуд 460 ўринли биносини мукаммал таъмирлаш ҳамда қўшимча 110 ўринли янги ўқув бино қуриш режалаштирилган. Айни пайтда қурилиш-таъмирлаш ишлари олиб борилаётганлиги сабабли мактаб ўқувчилари яқин атрофдаги ижтимоий соҳа объектларига кўчирилган. Жумладан, мактабнинг 428 нафар юқори синф ўқувчилари тумандаги 29-сонли умумтаълим мактабига кўчирилган. Улар мактабнинг учинчи қаватидаги фойдаланилмасдан бўш турган хоналарда таҳсилни давом эттиришмоқда. Ўқитувчи ва ўқувчиларга дарс машғулотлари ўтишлари учун етарли даражада шароитлар яратилиб, зарур ўқув жиҳозлари тўлиқ таъминланган, — дейди у.
Изоҳ (0)