Бухоро вилоятининг Ғиждувон туманида қўшмачилик қилиб муносиб хулқ-атворда бўлиш тўғрисида тилхат эҳтиёт чораси қўлланилган аёлга ушбу жиноятни такроран содир этгани учун 2 йилу 8 ой муддатга озодликни чеклаш жазоси тайинланди. Бу ҳақда «Дарё»га Жиноят ишлари бўйича Ғиждувон тумани суди судьяси Бобораҳим Очилов хабар берди.
Суд ҳужжатларига кўра, асли Қашқадарё вилоятининг Чироқчи туманида туғилган 38 ёшли аёл С.Б. айни пайтда ўзи яшаб келаётган Ғиждувон туманидаги «Шарқ» маҳалласида жойлашган кўп қаватли уйининг ётоқхонасида қўшмачилик жиноятини содир этган. У ҳамқишлоғи М.М.га ишқий муносабатда бўлиши учун аёл топиб беришини ва бунинг эвазига ундан ўз пластик картасига 200 минг сўм пул ўтказиб беришини сўраган.С.Б. фоҳишахона сақлаш ва қўшмачилик жиноятларини содир қилиш хатти-ҳаракатини давом эттирган ҳолда ўзига аввалдан таниш бўлган 27 ёшли аёл М.Ж.га М.М. билан жинсий алоқа қилиши учун қулай шароит яратиб берган. Ўзи эса уйининг ошхонасида кутиб турган.
Орадан чамаси икки соатларча вақт ўтган. М.Ж. фуқаро М.М.дан «ўз хизмати» эвазига 100 минг сўм ундирган. Шундан сўнг М.М. билан бирга С.Б.нинг яшаш уйидан чиқиб кетаётган вақтда, аёлнинг қайнукаси А.А. подъезднинг олдида улар билан тўқнаш келиб қолган. Саросимада қолган аёл маъшуқаси билан Matiz русумли йўналишли таксида воқеа жойидан қочиб кетишга уринган. Бироқ қайнука уларни ушлаб олган. У олдиндан С.Б.нинг қандай аёл экани ҳақида билгани учун ҳам акасининг хотинини сўроққа тутган. Аёл қайнукасига уйдаги пичоқларни устахонага олиб бориш учун йўл-йўлакай С.Б.нинг уйига кириб ўтаётганини билдирган. Бу орада фуқаро М.М. кетиб қолган. А.А. эса М.Ж.ни ушлаб туриб, онаси ва акасига қўнғироқ қилган ва уларнинг зудлик билан воқеа жойига етиб келишларини сўраган.
«С.Б. аввал ҳам қўшмачилик жиноятини содир этган. Шунингдек, М.Ж.нинг қайнонаси уни ножўя сўзлар билан ҳақорат қилгани учун уни ҳам урган. Суд тиббий экспертизасининг хулосасига кўра, аёлда пешона, иккала қош, бурун қирраси, ўнг лунж соҳасидаги қонталаш каби соғлиғининг қисқа муддат ёмонлашувига олиб келган енгил тан жароҳати қайд этилган. Ҳодиса жойида бўлган А.А.ни ножўя сўзлар билан ҳақорат қилган. Бундан ташқари, ошхона пичоғи уларни ўлдириб юборишини айтиб, бақир-чақир қилган», — дейди судья Бобораҳим Очилов.
Судда С.Б. ўз хатти-ҳаракатларини тан олмаган. Сўроқ қилинган М.М. эса С.Б.нинг унга қўнғироқ қилиб, жинсий алоқа қилиши учун қиз топганини, бунинг учун унинг пластик картасига 200 минг сўм миқдорида пул ташлаб берганини билдирган.
«Судланувчи С.Б. ҳолат очиқлангач, ўз айбига тўлиқ иқрорлик билдирди. У Жиноят кодекси 131-моддасининг 2-қисми (қўшмачилик қилиш ёки фоҳишахона сақлаш) ва 277-моддаси 2-қисмининг ‘в’ банди (безорилик)да кўрсатилган жиноятларини содир қилганликда айбли деб топилди. Бундан ташқари, унинг хатти-ҳаракатларига Жиноят кодексининг 59-моддаси, яъни бир нечта жиноят содир этганлик учун тартибида тайинланган жазоларни қисман қўшиш йўли билан 2 йил 8 ой муддатга озодликни чеклаш жазоси қўлланилди», — деди Бобораҳим Очилов.
Изоҳ (0)