Қозоғистон Мудофаа вазирлиги, гўёки, Россияга ҳарбий техника юборилаётгани акс этган видео юзасидан изоҳ берди, деб ёзади Tengrinews.
Ижтимоий тармоқларда ҳарбий техника колоннаси юриб бораётгани кўрсатилган видеолар тарқалмоқда. Унга ёзилган изоҳда ушбу колонна икки мамлакат президентлари ўртасидаги келишувга кўра, Қозоғистондан Россияга жўнаб кетгани айтилади.
Қозоғистон Мудофаа вазирлиги бу маълумотни рад этди.
«Хабар ҳақиқатга тўғри келмайди. Бу Қозоғистон техникасининг РФга юборилиши эмас», — дея изоҳ берди идора матбуот хизмати.
Вазирлик маълум қилишича, айни пайтда Қозоғистонда Коллектив хавфсизлик шартномаси ташкилоти (КХШТ) қўшма ҳарбий машғулотлари учун техника кўчириб ўтказилмоқда. Ўқув машқлари ҳақидаги ахборот муассасанинг расмий сайтига жойланган бўлиб, унда айтилишича, тадбирлар 26 сентябрдан 8 октябрга қадар Жамбил ва Алмати вилоятларида бўлиб ўтади.
«Ушбу ҳарбий машғулотларда қатнашиш учун 22—30 сентябрь кунлари мамлакатимизга КХШТга аъзо давлатлар ҳарбий контингентлари кириб келади. Улар турли усулларда — темир йўл, ҳаво транспорти ва ғилдиракли ҳарбий техника ёрдамида ҳаракатланади. Шу муносабат билан фуқаролардан ижтимоий тармоқларда тарқалаётган мишмишларга ишонмасликни ва фақат расмий ахборот манбаларига таянишни сўраймиз», — дейилган хабарда.
Аввалроқ Қозоғистон Ташқи ишлар вазирлиги республика, гўёки, Коллектив хавфсизлик шартномаси ташкилоти (КХШТ) аъзолигидан чиқиши ҳақидаги ахборотни рад этган эди.
КХШТ нима?
Коллектив хавфсизлик шартномаси ташкилоти — айни пайтда Арманистон, Беларусь, Қозоғистон, Қирғизистон, Россия ва Тожикистонни ўз ичига олган Евросиё ҳукуматлараро ҳарбий иттифоқи. Ташкилотни тузиш ҳақидаги шартнома 1992 йил 15 майда имзоланган.КХШТ мақсадлари тинчликни, халқаро ва минтақавий хавфсизлик ва барқарорликни мустаҳкамлаш, аъзо давлатлар мустақиллиги, ҳудудий яхлитлиги ва суверенитетини коллектив асосда ҳимоялашдан иборат.
Қозоғистонда 2 январь куни газ нархи кескин ошиши сабабли оммавий норозилик намойишлари бошланиб, бир неча кундан сўнг улар тартибсизликларга айланди. 4 ва 5 январь кунлари Олмаотада намойишчиларнинг хавфсизлик ходимлари билан тўқнашуви кузатилди. Қозоғистондаги тартибсизликлар фонида мамлакат бўйлаб фавқулодда ҳолат эълон қилинди. Мамлакат президенти Қосим-Жўмарт Тўқаев КХШТдан тинчликпарвар кучларини юборишни сўради. 6 январдан Қозоғистонга КХШТ ҳарбийларини жўнатиш бошланди.
11 январь куни Тўқаев мамлакатдаги вазият барқарорлашгани, икки кундан кейин тинчликпарвар кучларни олиб чиқиш бошланиши мумкинлигини маълум қилди. 19 май куни Россия Қозоғистондан тинчликпарвар кучларини олиб чиқишни якунлади.
Тўқаевнинг сўзларига кўра, КХШТ Қозоғистон учун оғир вазиятда кўмак кўрсатган, уларнинг келиши Олмаотани ҳужумчилардан озод этиш имконини берган. Олмаота ва тўққизта вилоят марказлари уларнинг қўлига ўтиб кетган пайт бўлди, бироқ КХШТ контингенти келиб, Қозоғистоннинг энг йирик шаҳрини ҳужумчилар қўлидан олиб қўйишга ёрдам берди, деганди мамлакат президенти.
Изоҳ (0)