Микротўлқинли печнинг хавфсизлиги ҳақда ҳали ҳам кўплаб саволлар туғилади. Кимёвий заҳарланиш, синган идишлар ва портлашлар жиҳозни нотўғри ишлатишнинг мумкин бўлган оқибатларидан фақат бир нечтаси холос. «Новий очаг» нашри ушбу маиший техникадан фойдаланишда йўл қўйиладиган хатолардан 10 тасини санаб ўтди.
Музлатилган гўшт
Кўпгина микротўлқинли печлар муздан тушириш функцияси билан жиҳозланганига қарамай, аксарият мутахассислар буни тавсия қилмайди. Ҳаммаси ҳароратнинг нотекис тақсимланиши билан боғлиқ: бўлакнинг қирралари эриса-да, гўштнинг ўрта қисми музлаганича қолиши мумкин. Бу пиширилажак таомнинг таъмига таъсир қилади.
Қуритилган мевалар
Микротўлқинли печда қуритилган меваларни юмшатишга уринмаслик лозим. Бу билан қуруқ мевалар намлик қолдиқларини йўқотиб, яроқсиз ҳолга келади. Ва уларнинг баъзилари (масалан, майиз) ҳатто қорайиб кетиши ҳам мумкин.
Аччиқ қалампир
Аччиқ қалампир қиздирилганда ўзидан ўткир моддаларни чиқаради. Улар печнинг эшиги очилиши биланоқ кўзнинг шиллиқ қаватига тушади. Бу жиддий муаммоларни келтириб чиқариши мумкин.
Болалар овқати
Болани тунда овқатлантириш жуда кўп энергия талаб қилади. Микротўлқинли печда она сути ёки сутли бўтқани тезда иситиш қанчалик осон бўлмасин, бу умуман мумкин эмас. Микротўлқинли печ таъсирида суюқлик қаттиқ исиб кетиши, бу эса чақалоқни зарар бериши мумкин.
Кийим
Ажабланарлиси шундаки, микротўлқинли печнинг баъзи эгалари ҳўл кийимларни тезда қуритиш техникасидан фойдаланади. Бу ҳам яхши фикр эмас. Печ ичида намлик тезда буғланади, бу матога зарар етказиши ва ҳатто ёнғинга олиб келиши мумкин.
Стирофомдан тайёрланган идишлар
Стирофомдан тайёрланган бир марта ишлатиладиган идишлар ҳеч қачон микротўлқинли печда қиздирилмаслиги керак. Микротўлқинли печлар таъсирида бу пластмасса идишлар ўзидан зарарли моддаларни чиқариши мумкин.
Қоғоз пакетлар
Қоғоз пакетлар ва картонли қадоқланган маҳсулотлар одатда қиздирилганда ёниб кетиши мумкин. Микротўлқинли печда қоғоз пакетни фақат камдан-кам ҳолларда иситилади. Бу ҳақда маълумот олиш учун маҳсулотнинг ёрлиғи билан танишиб чиқиш тавсия этилади.
Пластик идишлар
Баъзи пластмассаларни фақат қисқа вақт давомида иситиш мумкин. Озиқ-овқатларни пластик идишларда иситиш қатъиян тавсия этилмайди. Микротўлқинли печда пластик идишни ишлатиш мумкинлигини билиш учун идишнинг пастки қисмидаги белгиларни текшириш керак.
Керамика идишлар
Ҳамма керамика идишлар ҳам микротўлқинли печда фойдаланиш учун мос эмас. Чунки уларнинг аксарияти лойдан қилинган. Микротўлқинли печда радиация таъсирида намлик буғлана бошлайди, бу кўпинча идишларнинг синишига олиб келади.
Бўш микротўлқинли печ
Бўш микротўлқинли печни қасддан ёқиш мумкин эмас, аммо бу тасодифан содир бўлиши мумкин. Агар печда микротўлқинли нурланишни ўзлаштирадиган объект бўлмаса, микротўлқинлар печнинг ичидан яна магнетронга қайтади, бу муқаррар равишда унинг бузилишига олиб келади.
Изоҳ (0)