«Тўртинчи инсультдан кейин тўшакка михланиб қолди». Таниқли актёр ва режиссёр Машраб Кимсановнинг оғир хасталикка чалингани маълум қилинди (видео)
«Дарё» мухбирлари Ўзбекистонда хизмат кўрсатган артист Машраб Кимсанов оғир хасталикка чалингани ҳақидаги хабарни эшитиб, бемор ҳолидан хабар олгани борди. Актёрнинг рафиқаси Адолат Кимсанова турмуш ўртоғининг хасталиги ҳақида қуйидагиларни сўзлаб берди.
— Ҳаёт ташвишлари баъзан энг кучли инсонни ҳам енгиб қўяр экан. Баъзи инсонлар эътибор беришмайди ёки ўзларини бошқа юмушлар билан чалғитишади. Менимча, турмуш ўртоғим ана шундай ташвишларни кўнглига оғир олди. Умр бўйи «Кино яхши бўлиб кетади», деган умид билан кунни кунга улади. Мени ҳамиша «Ҳали зўр роллар ижро этамиз, қийинчиликлар ортга қолади», деб юпатарди-ю, аммо ўзи бунга амал қилмади. Машраб Кимсанов Россияда таҳсил олган, профессионал кино мутахассиси ҳисобланади. Бундай илмли ва катта тажрибага эга бўлган инсон кўчадан олиб келинган одамларга рол беришаётганини кўриб, юрагига оғир оларди.
Ҳатто ундан баъзи режиссёрлар бепул рол ижро этишини сўраган пайтлар ҳам кўп бўлди. Аммо ўшанда ҳам нолимай «Майли кино-ку», деб ролларини сидқидилдан ижро этарди. Аммо барибир йиллар давомида кўнглида йиғилган кемтиклар кун келиб катта касалликка чалинишига сабаб бўлди. 2018 йил илк инсультни бошидан ўтказди. Ҳассага таяниб бўлса-да, ўтган йили кинофестивалларга олиб бордим. Актёрлар қаторида юргани ҳам у инсонга анча далда бўлди. «Энди фестиваллар бўляпти, кино ҳам яхши бўлиб кетади», деб кўнгли кўтарилди.
Шунча йил яшаб, оиламизда бирор можаро бўлган эмас. Аммо яна кетма-кет икки марта инсультни бошидан ўтказди. Қайнанамнинг вафотидан кейин ота уйи Яйпанга бориб, ўша ерда тўртинчи инсультга чалинди. Тўшакка михланиб, оёқ-қўллари ишламай қолди. Бундай беморларни жойидан кўчириб бўлмайди дейишгани учун бир муддат водийда даволатдик. Ундан кейин Тошкентга олиб келиб, бу ерда ҳам узоқ муолажаларни олди. Аммо ҳозирча ўзгариш йўқ. Умидим бор, юрган оёқлар яна юриб кетишига ишонаман. Суянчиқ ёрдамида бир-икки қадам ташлаганига ҳам хурсанд бўламан. Илгари касални боқиш осонмас, дейишса тушунмаган эканман. Тўшакка михланиб қолганидан кейин бу гапларнинг мағзини чақяпман. Худога шукр, аввалгидан аҳволи анча яхшиланди.
Яхши ҳамки шогирдларим бор экан, баъзан съёмкаларга чақириб туришади. Машраб аканинг бош томонига егуликлар, оёқ томонига эса ҳожатга керакли нарсаларни қўйиб, бир-икки соатлик съёмкаларга бориб келаман. Қайтганимдан кейин «Яхшими, нима бўлди?» деб сўрайди. Шу аҳволда ҳам съёмкаларни гапирсам қувониб кетади. Барибир ижодкорда, бу гаплар уни суюнтиради.«Ўзбеккино», «Ўзбекфильм» деган ташкилотлар умуман хабар олишмайди, ишлари ҳам йўқ. Кино арбоблари уюшмасидан бир-икки марта хабар олишди. Ҳар замонда актёр Ражаб Адашев қўнғироқ қилиб туради. Бу йилги байрамда кимдир келар, ҳеч бўлмаса қўнғироқ қилар деб кутдим. Аммо жимжит.
Актёр юриб турса ҳаммага керак, ётиб қолса бутунлай унутиб юборилар экан. Мен-ку, майли менга эътибор беришсин демайман, аммо умрни ва саломатлигини кино ривожи учун сарфлаган инсонга ҳеч бўлмаса байрам куни битта кўкрак нишон бериш кимни ўлдирибди? Кўряпман, баъзиларга икки мартадан мукофот беришяпти, — дейди актриса Адолат Кимсанова.
Бу ерда видеони тўлиқ томоша қилишингиз мумкин.
Эслатиб ўтамиз, Ўзбекистонда хизмат кўрсатган артист Машраб Кимсанов 1955 йили Фарғона вилоятида таваллуд топган. «Отамдан қолган далалар», «Водиллик келин», «Оловли йўллар»каби 40 дан ортиқ фильмлардан ажойиб ролларни ижро этган. Режиссёр сифатида эса «Тоғлик куёв» ва «Беш қисмат» номли фильмларни суратга олган.
Мавзуга доир:
- «Масхарабоз» фильмидаги актёр Эргаш Мўминов нега экранларда кўринмай қолди? (фото)
- «Парвона» спектаклида Юлдузхон образини яратган актриса Шукуржон Сафаева ҳозир қаерда?
