Қишлоқ хўжалиги вазирлиги органик маҳсулотлар етиштиришни бошлаш учун нималар қилиш зарурлиги, қандай қадамларни босиб ўтиш кераклиги ҳақида тафсилотларга тўхталди.
Кимга мурожаат қилиш керак?
Органик маҳсулотларни етиштирувчи агрокластер ва фермер хўжаликларига ишни бошлаш учун «Қишлоқ хўжалигида стандартлаштириш маркази», «АКИС» марказларига ва бошқа хусусий йўналиш бўйича маслаҳат хизмати кўрсатувчи компанияларга мурожаат қилишлари керак бўлади.
Марказлар шартнома асосида ишлаб чиқарувчиларга зарур барча маслаҳатларни бериб боради.
Жумладан:
- қайси маҳсулотни ишлаб чиқариш;
- органик мувофиқлик сертификатини олиш юзасидан қайси мувофиқликни баҳолаш органига ариза билан мурожаат қилиш кераклиги;
- органик қишлоқ хўжалиги ва озиқ-овқат маҳсулотлари ишлаб чиқаришни ихтиёрий сертификатлаштиришга ўтказиш бўйича шартнома тузиш;
- органик ишлаб чиқаришда техник жиҳатдан тартибга солиш соҳасидаги норматив ҳужжатлар, мувофиқликни баҳолаш усуллари ва тартиб-қоида ҳужжатларини юритиш;
- ишлаб чиқарувчининг маҳсулотларини қайси давлатга экспорт қилиш бўйича тавсиялар берилади.
Органик маҳсулотларни ишлаб чиқаришга ўтиш шартлари
Органик маҳсулотларни ишлаб чиқаришга ўтиш шартлари қуйидагилардан иборат:
- органик маҳсулотларни ишлаб чиқарувчи ва мувофиқликни баҳолаш органи билан органик маҳсулотларнинг мувофиқлигини баҳолаш тўғрисида шартнома тузиш;
- маҳсулотларни ишлаб чиқариш жараёнини органик маҳсулотлар тўғрисидаги қонунчилик ҳамда техник жиҳатдан тартибга солиш соҳасидаги норматив ҳужжатлар талаблари билан мувофиқлаштириш;
- органик маҳсулотларни ишлаб чиқариш органик маҳсулотлар тоифасига кирмайдиган маҳсулотларни ишлаб чиқаришдан алоҳида тарзда амалга оширилади;
- ўтиш даврида ишлаб чиқарилган маҳсулотларни «ўтиш давридаги органик маҳсулотлар» сифатида тамғалаш ва реализация қилиш.
Органик маҳсулотлар тоифасига кирмайдиган маҳсулотларни ишлаб чиқаришдан органик маҳсулотларни ишлаб чиқаришга ўтиш чоғида ўтиш даври белгиланади.
Маҳсулотларни ишлаб чиқарувчи томонидан бу давр ичида органик маҳсулотлар тўғрисидаги қонунчилик ҳамда техник жиҳатдан тартибга солиш соҳасидаги норматив ҳужжатлар талабларининг бажарилиши таъминланади.
Стандартлар ва сертификатланган маҳсулотлар турлари
Мамлакатда қишлоқ хўжалиги ва озиқ-овқат саноати корхоналари томонидан сифат менежменти талаблари асосида 2020 йилдан бугунги кунгача жами 34 та «Organic» сертификати олинган.
Бу етиштирилаётган маҳсулотлар турлари қуйидагича:пахта, ловия, буғдой, помидор, қайта ишланган пахта (текстил маҳсулотлари), турли хил целлюлоза қоғозлари, доривор ўсимликлар, ковул, қуритилган узум, қуритилган гилос, узум, бодом ёғи, бодом, ўрик, ўрик ёғи, қора майиз, қуритилган майда кесилган ўрик, қуритилган бутун ўрик, «Султон» майизлари, «Томпсон» майизлари, узум, оддий майиз ва бошқа маҳсулотлар.
Қишлоқ хўжалиги ва озиқ-овқат саноати корхоналари томонидан сифат менежменти талаблари асосида 2020 йилдан бугунги кунгача жами 239 та «Global G.А.P.» сертификати олинган.
Уларда етиштирилаётган маҳсулотлар турлари қуйидагича: узум, саримсоқпиёз, олма, гилос, помидор, мош, каперс, қалампир, укроп, қовун, тарвуз, лимон, музлатилган мева-сабзавот маҳсулотлари, нектарин, нок, шафтоли, олхўри, анор, бодринг, пиёз, булғор қалампири, бақлажон, брокколи карами, гулкарам, салат барги, ўрик, малина ва бошқалар.
Изоҳ (0)