Андижонда тадбиркорлик фаолиятини йўлга қўйиш истагида бўлган, «аёллар дафтари»га киритилган 100 нафар хотин-қизга тикув дастгоҳлари бепул тарқатилди. Бу ҳақда «Дарё» мухбири хабар бермоқда.
Маълум қилинишича, Андижон вилояти ҳокими Шуҳрат Абдураҳмонов 9 августдан 19 августга қадар вилоятда оғир шароитларда яшаётган аёлларнинг муаммоларини ўрганиш, уларни меҳнат бозорида талаб этилаётган касблар бўйича қайта тайёрлаш ва ишга жойлаштириш, тадбиркорлик фаолиятини ташкил этишига кўмаклашиш мақсадида «Хотин-қизлар билан ишлаш долзарб ўн кунлиги»ни эълон қилган.
Шу муносабат билан шаҳар-туман ҳокимлари, сектор раҳбарлари томонидан жойларда хотин-қизлар билан учрашув ва мулоқотлар ўтказилмоқда.
Вилоят ҳокимлиги ахборот хизматининг маълум қилишича, ўн кунлик доирасида Шуҳрат Абдураҳмонов Андижон шаҳридаги Алишер Навоий номидаги маданият ва истироҳат боғида хотин-қизлар билан очиқ мулоқот ўтказган. Мулоқот давомида «аёллар дафтари» ва «ёшлар дафтари»га киритилган бир гуруҳ хотин-қизларнинг мурожаат ва муаммоларини эшитиб, тегишли мутасаддиларга мурожаатларнинг ечими бўйича топшириқ берган.
Учрашув якунида тадбиркорлик фаолиятини йўлга қўйиш истагида бўлган, аммо амалга оширолмаётган, «аёллар дафтари»га киритилган 100 нафар хотин-қизга субсидия асосида замонавий тикув дастгоҳлари топширилган.
Изоҳ (0)