Буюк Британия бош вазирлигига номзод ва ташқи ишлар вазири Лиз Трасс ҳукумат раҳбари лавозимини эгаллаган тақдирда, Тайванга ташриф буюришдан бош тортишга ваъда берди.

«Йўқ, бормайман», — деди Трасс сайловолди дебатлари чоғида телебошловчининг агар Британия бош вазири бўлса, у Тайванга ташриф буюрадими ёки йўқми, деган саволига жавобан.

Аввалроқ АҚШ Конгресси Вакиллар палатаси спикери Нэнси Пелосининг Тайванга ташрифи АҚШ ва Хитой ўртасидаги муносабатларнинг кескинлашувига олиб келган эди. Хитой раҳбари Си Цзиньпин Қўшма Штатларни «ўт билан ўйнаган куйиб қолиши» ҳақида огоҳлантирди. Шу билан бирга, АҚШ маъмурияти Пекинни «ягона Хитой» сиёсатига содиқлигига ишонтирди ва Пелоси ўз қарорларини фақат ўзи қабул қилишини таъкидлади.

Трасс собиқ молия вазири Риши Сунак билан бирга Консерватив партия парламент сайловларининг якуний босқичига чиқди. Ғолиб партия раҳбари ва Буюк Британиянинг янги бош вазирига айланади. Бош вазир ким бўлиши 5 сентябрь куни маълум қилинади.

Иккала номзод ҳам қиролликнинг можарога бевосита аралашувисиз Украинага ҳарбий-техник ёрдам кўрсатишни давом эттириш ниятида эканини маълум қилган.

Лиз Трасс агар бош вазир этиб сайланса, биринчи бўлиб Украина президенти Владимир Зеленскийга қўнғироқ қилишга ваъда берган.