Фарғона шаҳридаги Ислом Каримов номидаги вилоят театр-концерт саройида дўстлик фестивали бўлиб ўтди. Мазкур фестивалнинг якуний маросимида иштирок этган «Дарё» мухбирлари тадбирнинг эътиборга молик лаҳзаларини суратга олди.
Халқлар дўстлиги куни муносабати билан ўтказилган фестивалда вилоят ҳокими Хайрулло Бозоров, сектор раҳбарлари, миллий маданий марказлар, дўстлик жамиятлари ва хорижлик ҳамкорлар иштирок этди.
Фестивальга ташриф буюрган меҳмонлар вилоятда фаолият олиб бораётган миллий маданий марказлари томонидан очиқ майдонда ташкил этилган кўргазмаларни кўздан кечирди.
Фестивальда вилоятдаги қирғиз, турк, немис, татар, тожик, рус ҳамда корейс миллий маданий марказлари фаоллари ўз одат ва анъаналари акс этган чиқишлари билан қатнашди.
Миллий маданий марказлар ва дўстлик жамиятлари томонидан махсус павильонлар ташкил этилиб, ўша миллатга хос урф-одатлар кўрсатиб берилди, миллий таомлар ва ҳунармандчилик маҳсулотлари кўргазмалари, халқ амалий санъати — фольклор намуналари намойиш қилинди.
Мамлакатимизда Халқлар дўстлиги кунини нишонлашдан асосий мақсад — турли миллат ва элатлар ўртасидаги дўстона муносабатларни яна-да мустаҳкамлашдан иборат. Ушбу кунда Ватанимизда истиқомат қилаётган барча миллатларнинг ўз урф-одатлари ва асрий қадриятлари яна-да эъзозланади, эзгулик, бирдамлик, тинчлик ва осойишталик тараннум этилади.
Фестивальда Халқлар дўстлиги куни муносабати билан «Меҳнат шуҳрати» ордени билан тақдирланган Сўх тумани нуронийлар жамоатчилик кенгаши фаоли Сувхидин Шарофидинов, Wiedergeburt Ўзбекистон-немис миллий маданий марказининг Фарғона вилояти бўлими раиси Валентина Миллернинг ютуқлари алоҳида эътироф этилди.
Вилоятда фаолият олиб бораётган корейс, тожик, яҳудий, турк, қирғиз, немис, татар, славян миллий маданий марказлари раҳбарлари вилоят ҳокимининг фахрий ёрлиқ, эсдалик совғалари билан тақдирланди.
Таниқли санъаткорлар ҳамда миллий маданий марказлари ижодкорлари томонидан намойиш этилган концерт дастури байрам иштирокчиларига кўтаринкилик улашди.
Маълумот учун, Ўзбекистонда 2021 йилдан буён 30 июль — Халқлар дўстлиги куни сифатида кенг нишонланиб келинмоқда.
БМТ Бош Ассамблеяси 2011 йилда қабул қилган резолюцияда халқлар, давлатлар, маданиятлар ва инсонлар ўртасидаги дўстлик, тинчликни таъминлаш билан боғлиқ ҳаракатларга илҳомлантириш ҳамда маданий хилма-хилликни ҳурмат қиладиган жамиятлар ўртасида кўприклар ўрнатиш мақсадида 30 июль – Халқаро дўстлик куни (International Day of Friendship) сифатида белгиланган.
Расмий маълумотларга кўра, Ўзбекистонда 130 дан зиёд миллат ва элат вакиллари, 16 та диний конфессия аъзолари истиқомат қилади. Шунингдек, юртимизда кўплаб миллий маданий марказ фаолият юритмоқда. Умумтаълим мактабларида ўқитиш етти тилда олиб борилади.