«Ўзбекнефтгаз» АЖ бошқарув раиси Меҳриддин Абдуллаевнинг топшириғи билан мамлакатнинг миллий бойлиги ҳисобланган нефть ва конденсат маҳсулотларини талон-торож қилиш йўли билан қўлга киритиш ҳаракатида бўлган шахсларга қарши курашиш, уларнинг ноқонуний қилмишларини олдини олиш бўйича тизимли ишлар олиб борилмоқда.
«Ўзбекнефтгаз» АЖ алоқа каналлари орқали келиб тушаётган хабарлар таҳлили натижасида жорий йилнинг июль ойида Молиявий ва комплеанс назорати департаменти томонидан «Гиссарнефтгаз» ҚК МЧЖ тасарруфидаги конларда жойлашган нефть ва газ конденсати қувурларига бегона шахслар томонидан талон-торожлик мақсадида ноқонуний уланишга ҳаракат қилиш ҳолатлари аниқланди.
Хусусан, олиб борилган ўрганишлар натижасида корхонанинг «Шакарбулоқ» конида маҳсулотни ўзлаштириш учун нефть қувурига қўлбола усулда ёғочдан ясалган қозиқ ўрнатилгани ҳамда «Шимолий Ғузор» кони ҳудудидан ўтган конденсат қувурига хомутлар ёрдамида уланган шланг ва вентил мосламалари тайёрланиб қўйилгани маълум бўлди. Салбий ҳолатлар зудлик билан бартараф этилди ва ўғирликнинг олди олинди.
Ҳолат юзасидан ўрнатилган тартибда ҳужжатлар расмийлаштирилиб, ҳуқуқий баҳо бериш ва қонуний чоралар кўриш мақсадида ҳуқуқни муҳофаза қилувчи идораларга тақдим этилди.
«Ўзбекнефтгаз» АЖнинг олис ҳудудларда жойлашган нефть ва газ конларида жазирама иссиқ ва қаҳратон совуқларда тинмай меҳнат қилаётган соҳа ишчи-ходимлари меҳнати самараси ўлароқ, қийинчиликлар билан қазиб олинаётган маҳсулотларни ғаразли ниятларда ўз манфаатлари йўлида ўзлаштиришга қаратилган «уддаброн шахслар»нинг ҳаракатлари соҳанинг ривожланишига салбий таъсир қилмоқда.
Шу муносабат билан, «Ўзбекнефтгаз» АЖ раҳбарияти юртдошларимиздан юқорида келтирилгани каби салбий ҳолатлар билан боғлиқ маълумотлар бўлган тақдирда Жамиятнинг алоқа каналлари орқали хабар беришларини сўрайди:
Ишонч телефони: +(99871) 233-28-88
Бизнинг почта манзилимиз: kans@ung.uz
Молиявий ва комплаенс назорат департаменти почта манзили: compliance@ung.uz
Telegram бот: @ung_anticorBot
«Ўзбекнефтгаз» АЖ матбуот хизмати
Изоҳ (0)