Эстония ҳукумати 28 июль, пайшанба куни бўлиб ўтган давлат йиғилишида янги санкцияни маъқуллаган, унга кўра, россияликлар энди Эстонияда вақтинчалик яшаш учун рухсатнома ва ўқиш визасини олиш учун мурожаат қила олмайди. Бу ҳақда «Интерфакс» хабар берди.

Бундан ташқари, Эстонияда Россия ва Беларусь фуқароларини қисқа муддатли ишга жойлаштириш фақат мамлакат томонидан берилган амалдаги визага эга бўлган шахсларгагина  тақдим этилиши  мумкин.

Аниқлик киритилишича, Россия ва Беларусь фуқароларига Европа Иттифоқига аъзо давлат томонидан бериладиган узоқ муддатли визага аризалар қабул қилинмайди.

Ушбу ўзгариш билан амалдаги санкцияларни четлаб ўтиш учун бошқа аъзо давлатдан қисқа муддатли Шенген визаси, масалан, сайёҳлик мақсадида сўраладиган визага ҳам чек қўямиз», — деди Эстония ташқи ишлар вазири Урмас Рейнсалу.

Россияга қарши санкцияларни давом эттириш ва унга тинимсиз босим ўтказиш зарур. Агарда бу ҳаракатларимиз Россия агрессиясини тўхтатишга ёрдам берса, бу бизнинг хавфсизлигимизга ижобий таъсир қилади», — дея қўшимча қилади у.