2022 йилнинг биринчи ярмида Ўзбекистон иқтисодиёти асосий савдо шериклари бўлган мамлакатлардаги беқарорлик, жаҳон товар бозоридаги ўзгарувчанликнинг ошиши билан боғлиқ ташқи рисклар таъсири остида қолди, деб ёзмоқда Review.

Шунга қарамай, Ўзбекистон иқтисодиёти биринчи ярим йилликда ижобий ўсиш динамикасини кўрсатди.

Давлат статистика қўмитаси маълумотларига кўра, Ўзбекистон ялпи ички маҳсулоти (ЯИМ) 2022 йилнинг январь—июнь ойларида ўтган йилнинг мос даврига нисбатан 5,4 фоизга ўсди.

Инфляция

Биринчи ярим йилликда ташқи шоклар фонида йиллик инфляция бироз тезлашди ва 6,5 фоизни ташкил этди.

Нархлар ўсишининг тезлашиши озиқ-овқат маҳсулотларида — 8,9 фоиз, шунингдек, ноозиқ-овқат маҳсулотларида — 5,8 фоизни қайд этди. Хизматлар нархи 3,3 фоизга кўтарилди.

Инвестициялар

2022 йил январь—июнь ойи натижаларига кўра, асосий капиталга йўналтирилган инвестициялар 121,8 трлн сўмни ташкил этди ва ўтган йилнинг мос даврига нисбатан 9,4 фоизга ўсди.

Марказлаштирилмаган инвестициялар бўйича ўсиш динамикаси 17,6 фоизга ошди. Жалб этилаёган тўғридан-тўғри хорижий инвестициялар ва хорижий кредитлар ҳисобидан инвестициялар ҳажми 5,2 фоиздан зиёдга ортди.

Шунингдек, корхоналар маблағлари ҳисобидан инвестициялар бўйича икки баравар ўсиш 35 фоизни ташкил этди.

Марказлаштирилган инвестициялар 27,5 фоизга қисқарди. Хусусан, давлат томонидан кафолатланган хорижий кредитлар ҳисобига инвестициялар 54,3 фоизга камайди. Шу билан бирга, бюджет инвестициялари 30,4 фоизга ўсди.

2022 йилнинг биринчи ярмида инвестицияларнинг умумий ҳажмида марказлаштирилган инвестицияларнинг улуши 18,1 фоиздан 12 фоизга камайди ва марказлаштирилмаган инвестицияларнинг улуши мос равишда 81,9 фоиздан 88 фоизга ўсди.

Саноат маҳсулотларини ишлаб чиқариш

2022 йил январь—июнь ойларида корхоналар томонидан 251,4 трлн сўмлик саноат маҳсулотлари ишлаб чиқарилди, ўсиш ўтган йилнинг шу даврига нисбатан 5,1 фоизни ташкил этди.

Хизматлар сектори

Хизмат кўрсатиш соҳаси биринчи ярим йилликда икки хонали ўсиш суръатларини кўрсатди. Бозор хизматлари ишлаб чиқариш ҳажми 14,5 фоизга ошди.

Молиявий секторда — 28,8 фоиз, АКТ соҳасида — 21,3 фоиз бошқа хизматларда — 15,2 фоизга ўсди.

Турар жой ва умумий овқатланиш соҳасида хизматлар ҳажми 13,9 фоиз, транспорт секторида 11,2 фоиз, кўчмас мулк билан боғлиқ хизматлар соҳасида эса 10,3 фоизга ўсди.

Қурилиш сектори

2022 йил январь—июнь ойларида қурилиш ишлари ҳажми 60,3 трлн сўмни, ўсиш суръати 6,2 фоизни ташкил этди. Таққослаш учун, ўтган йилнинг биринчи ярмида бу кўрсаткич 0,1 фоизни ташкил этган.

Қишлоқ хўжалиги

2022 йил январь—июнь ойларида қишлоқ, ўрмон ва балиқ хўжалиги маҳсулотлари ҳажми 131,7 трлн сўмни ташкил этди ва 2021 йилнинг мос даврига нисбатан 2,7 фоизга ўсди.

Шу билан бирга, ўсимликшунослик ва чорвачиликда ўсиш суръатлари 2,7 фоиз, ўрмон хўжалигида 2,0 фоиз, балиқчиликда 11,5 фоизни ташкил этди.

Аввалроқ Ўзбекисоннинг 2022 йил январь—июнь ойларидаги ташқи савдо айланмаси маълум бўлган.