Антимонополия қўмитаси огоҳлантиришидан сўнг Андижонда метан газ нархлари 1900 сўмгача тушди (видео)

Антимонополия қўмитаси метан гази нархларини сунъий равишда оширган газ қуйиш шохобчаларига чора кўрилишини маълум қилгач, Андижондаги газ қуйиш шохобчаларида метан газ нархи 1900 сўмгача тушди. Бу ҳақда «Дарё» мухбири Умиджон Мамарасулов хабар берди.

Вазирлар Маҳкамасининг 2022 йил 14 июлдаги қарорига мувофиқ юридик шахслар учун табиий газ ва электроэнергия учун тарифлар оширилиши вақтинчалик тўхтатилганди. Шунга қарамай, айрим газ қуйиш шохобчаларида 15 июлдан бошлаб метан гази нархи оширилгани ҳақида хабарлар тарқалди. Энергетика вазирлиги ҳолатга муносабат билдириб, ҳукумат қарорига кўра, газ қуйиш шохобчалари учун маҳсулотларни сотиш нархлари ошмагани ва бир хил даражада сақланиб қолганини метан нархини оширишнинг объектив сабаблари йўқлигини маълум қилди. Шундан сўнг Монополияга қарши курашиш қўмитаси ҳолат юзасидан ўтказилган тезкор ўрганиш ишлари натижаларини эълон қилди.

«Дарё»нинг Андижон вилоятидаги мухбири вилоятдаги газ қуйиш шохобчаларида бўлиб, бугунги кундаги нархлар билан қизиқди.

Аниқланишича, Андижон шаҳрида фаолият юритаётган аксарият шохобчаларда 1 куб метр газ 2500 сўмдан сотилмоқда.

Андижон—Шаҳрихон автомобиль йўналишидаги шохобчаларда эса 2000 сўмдан 2300 сўмгача сотилмоқда. 15 июль куни бошқа жойларда нарх ошишига қарамасдан нархни 2300 сўмгача тушириб, акция ўтказишни бошлаган Андижон—Хонобод автомобиль йўлида газ қуйиш шохобчалари эса рақобатни кучайтирган.

Ушбу шохобчалардан бири 16 июль куни 1 куб метр газ нархини дастлаб 2300 сўмдан сотган, қўшни шохобчада эса 2250 сўмдан сотилган, 17 июль куни эса 2000 сўмга туширган. 2250 сўмдан газ сотган шохобча эса 17 июль куни 1 куб метр газ нархини 1990 сўмдан сота бошлаган.

Ушбу рақобатга қўшилган Жалақудуқ туманидаги шохобчалардан бири эса нархни 1900 сўмга тушириб, мижозларни жалб қилишга киришган.

Шохобчалардаги нархлар тушиши давом этмоқда.