«Ўзавтосаноат»нинг соф фойдаси 25 млрд сўмга камайган

Автомобиль саноатидаги 40 га яқин корхонани ўзида бирлаштирган «Ўзавтосаноат» 2021 йил якунларини сарҳисоб қилди.

Компаниянинг асосий фаолиятидан келган даромадлари 29,1 миллиард сўмни ташкил этган. Бу 2020 йилнинг мос даврига нисбатан 5,3 миллиард сўмга кам.

Молиявий фаолиятдан келадиган тушумлар ўтган йилда 134,6 млрд сўмни ташкил этди.Таққослаш учун, 2020 йилда 208,3 млрд сўм бўлган.

Компаниянинг умумий харажатлари 218,9 млрд сўмдан 54,7 млрд сўмгача камайди.

«Ўзавтосаноат»нинг валюта йўқотишлари 2020 йилда 11 млрд сўмни ташкил этган бўлса, 2021 йилда бу кўрсаткич 2,8 млрд сўм бўлди.

Умумий иқтисодий фаолиятдан келадиган фойда 217,6 млрд сўмдан 151,9 млрд сўмгача тушиб кетган.

Даромад солиғи 2020 йилда 57,3 млрд сўм бўлган, 2021 йилда 15,5 млрд сўмни ташкил қилди.

2021 йилда компаниянинг соф фойдаси 136,4 млрд сўм бўлди. Бу 2020 йилдаги кўрсаткичдан 23,6 млрд сўмга кам.

Аввалроқ Ўзбекистонда тўрт ойда енгил автомобиль ишлаб чиқариш ҳажми 30 мингтага ошгани ҳақида хабар берилганди.