Рустам Ашурматовга Россия клуби қизиқиш билдирмоқда

Ўзбекистон миллий терма жамоаси ва «Навбаҳор» ҳимоячиси Рустам Ашурматов фаолиятини Россия чемпионатида давом эттириши мумкин.

Metaratings нашрининг ёзишича, «Рубин» Ашурматовга қизиқиш билдирмоқда. Рустамга даъвогарлик қилаётганлар рўйхатида Россиянинг бошқа клублари ҳам бор, аммо футболчи учун курашда «Рубин» фаворит ҳисобланади.

Маълумот учун, 26 ёшли Рустам Ашурматов Ўзбекистон терма жамоасида 19 та ўйин ўтказган. У бунгача «Бунёдкор», шунингдек, Кореянинг «Кванжу» ва «Канвон» клублари шарафини ҳимоя қилган. Transfermarkt портали футболчини 750 минг еврога баҳолаган.

Аввалроқ «Рубин»нинг ўзбекистонлик яна бир футболчи – «Бунёдкор»нинг 18 ёшли ярим ҳимоячиси Умарали Раҳмоналиевга қизиқиш билдираётгани ҳақида хабар берилганди.