Беларусь президенти Александр Лукашенко яқин келажакда Марказий Осиёда икки куч ҳукмронлиги учун кураш олиб борилиши мумкинлигини айтди: бир томондан АҚШ ва Европа Иттифоқи, иккинчи томондан Хитой. Бу фикрни давлат раҳбари Минскда Мустақиллик куни муносабати билан ўтказилган тантанали йиғилишда билдирди.
Йил бошида Лукашенко Қозоғистондаги январь воқеаларини шарҳлар экан, Ўзбекистон провокациялар учун навбатдаги нуқтага айланиши мумкинлигини башорат қилган эди.
«Биз ўзбекларга кўп фактларни келтирдик, саммитлардан бирида буни айтганимда улар мендан қандайдир ранжиди. Кеча нима бўлди? Қорақалпоғистон Республикаси, Ўзбекистоннинг қарийб ярми, ...гўёки конституцияда нимадир нотўғри ва у бош кўтарди. Йўқ! Ўзбекистон чайқалишни бошлади. Ва бугун бу ишларда чет элликларнинг қўли борлиги айтилмоқда», — деди Беларусь раҳбари.
«Марказий Осиё, худди биз каби икки олов орасида қолди: бир томондан, европаликлар, америкаликлар, иккинчи томондан, Марказий Осиёнинг омон қолишига катта ёрдам бераётган Хитой. Бунинг белгилари аллақачон пайдо бўлган», — деди Лукашенко 2 июль кунги баёнотида.
2022 йилнинг январь ойида КҲШТ йиғилишида Лукашенко Қозоғистонда бўлиб ўтган тартибсизликлардан Ўзбекистон ҳушёр бўлиши кераклигини айтганди.
«Қозоғистондаги вазиятдан, аввало, Ўзбекистон ҳушёр бўлиши керак, акс ҳолда, биздаги маълумотларга кўра, тўполон ташкилотчиларининг нигоҳи, жумладан, Ўзбекистонга қаратилган», — деган Беларусь раҳбари.
Лукашенконинг бу гапларини ўзбек блогерлари Ўзбекистонга босим ўтказиш деб қабул қилди. Тармоқ фаолларига кўра, бу — Ўзбекистонни КҲШТга тортиш ҳаракатининг навбатдаги, очиқ-ойдин янграган белгисидир. Таҳлилчилар унинг огоҳлантириши ўринсиз экани, Ўзбекистонда Қозоғистондаги каби қўшҳокимият йўқлигини таъкидлаган.
Изоҳ (0)