«Янги Конституция Шавкат Мирзиёевга яна сайловда иштирок этиш имкониятини беради» – Содиқ Сафоев

Ўзбекистонда янги Конституция қабул қилингач, ҳамма қатори амалдаги президент Шавкат Мирзиёевга ҳам сайловларда қатнашиш имкони яратиб берилади. Бу ҳақда Олий Мажлис Сенати раисининг биринчи ўринбосари Содиқ Сафоев «Kun.uz» мухбири билан суҳбатда маълум қилди.

Қайд этилишича, мухбир Сенат раиси биринчи ўринбосарининг асосий қомусга ўзгартиришлар киритишдан асосий мақсад президент ваколат муддатларини узайтириш экани ҳақидаги гапларга муносабати билан қизиққан. Сафоевнинг айтишича, янги Конституция қабул қилинса, у барча фуқаролар учун, шу жумладан ҳозири президент учун ҳам сайловларда иштирок этишга имконият яратиб беради — «бу – халқаро тажриба».

Президентимиз бу имконият ва ҳуқуқдан фойдаланадими, фойдаланмайдими, бу биринчи навбатда ушбу шахсга ҳавола. Бу шахсни кўрсатадиган сиёсий партияга ҳавола. Лекин бу ҳақ-ҳуқуқ у кишида бўлади.

Шахсан, менинг фикримни сўрасангиз, тажрибадан келиб чиқиб ва халқаро вазиятни таҳлил қилган инсон сифатида шуни айтишим керакки, бугун биз бир ниҳоятда таҳликали дунёда яшаяпмиз. Лекин шунга қарамасдан, биз ислоҳотларни давом эттиришимиз керак. Мен аминманки, бу ислоҳотларни бошлаган инсонда уни охиригача етказишга имконият бўлиши керак. Буни мен ким билан хоҳласангиз ва қаерда хоҳласангиз баҳс қилишим мумкин.

Биз ҳаммамиз сўнгги беш йилда шуни кўрдикки, давлат раҳбари, президентимиз Шавкат Миромонович Мирзиёев қандайдир ҳокимиятга тиш-тирноғи билан ёпишиб олган сиёсатчи эмас. Кўриб турибмиз, у киши эл-юрт ва ватан учун хизмат қилишга бел боғлаган, ўз умрини бағишлаган инсон. Кўриб турибмизки, халқимизнинг оғирини енгил қилиш, бирини икки қилиш, келажагини таъминлаш учун қанчалик ҳаракат қиляпти.

Яна бир бор айтмоқчиман, башарти янги Конституция қабул қиладиган бўлсак, бу биз учун янги имкониятлар яратади. Ислоҳотларимиз ва олиб борилаётган сиёсатларимизни давомийлиги ва изчиллигини таъминлаш биз учун муҳим масала. Бу эса президент Шавкат Миромонович Мирзиёевнинг номи билан боғлиқ. У киши қандай қарор қабул қиладилар, билмайман, шахсан мен шу давомийликни таъминлашнинг тарафдориман», — деган Содиқ Сафоев.