Самарқанднинг «Динамо» клуби мураббийлар штабида ўзгариш юз берди.
Самарқандликлар матбуот хизматининг ёзишича, 20 май куни клуб қароргоҳида раҳбарият ҳамда жамоа иштирокида йиғилиш ўтказилган. Унда жамоанинг сўнгги турларда қайд этган қониқарсиз натижалари муҳокама қилиниб, жамоа бош мураббийи Предраг Роган билан хайрлашилгани маълум қилинган.
Сербиялик мутахассис билан бирга унинг ёрдамчиси Иван Евич билан ҳам ҳамкорлик тўхтатилган. «Динамо» ва мураббийлар ўртасидаги шартнома икки томонлама бекор қилингани қўшимча қилинмоқда.
Предраг Роган мавсум аввалида самарқандликлар бошқарувига келган, томонлар бир йиллик шартнома имзолаганди.
Шунингдек, «Динамо» янги бош мураббий номини ҳам эълон қилди. Эндиликда жамоани шу пайтга қадар клуб спорт директори лавозимида фаолият юритган Андрей Шипилов бошқаради.
Андрей Шипилов бунгача «Пахтакор» мураббийлар штабида ва «Металлург» бош мураббийи сифатида фаолият юритган.
«Динамо» Суперлига 9-туридан кейин 6 очко билан сўнгги, 14-ўринда бормоқда. 10-тур доирасида жамоа 23 май куни ўз майдонида «ОКМК»ни қабул қилади.
Аввалроқ «Бунёдкор» бош мураббийи Шуҳрат Мақсудов истеъфога чиқарилганди. Тошкент клуби бунга сабаб қилиб сўнгги ўйинларда қайд этилган қониқарсиз натижаларни кўрсатганди.
Изоҳ (0)