Февраль ойи охиридан бошлаб Украинага қарши урушни қўллаб-қувватламайдиган юз минглаб россияликлар бошқа давлатларга, жумладан, Ўзбекистонга кўчиб ўтган. «Коммерсантъ ФМ» уларнинг баъзилари билан суҳбатлашиб, нима учун айнан Ўзбекистонни танлагани ва бу ерда қандай яшаётганликларини билиб олди.
«Мамлакат очиқ бўлди»
Ўзбекистоннинг асосий афзалликларидан бири Россия фуқаролари учун визасиз режимдир. Бундан ташқари, охирги уч йил давомида мамлакат «Бизнес юритиш» рейтингида ҳам ўз ўрнини сезиларли даражада мустаҳкамлади ва компанияларни рўйхатдан ўтказиш қулайлиги бўйича етакчи 10 давлат қаторига кирди.
Мамлакатда, умуман олганда, тадбиркорлик учун жуда қулай шароитлар яратилган, дейди тадбиркор Рустам Авезов:
Ўзбекистонда иқтисодиёт эндигина ривожлана бошлади, мамлакат очиқ бўлди, йирик жаҳон брендлари келди. Кўпгина корхоналар чет элликлар учун иш таклиф қилмоқда.
Ҳукумат яқинда хорижликларга «эшикларини кенгроқ очди» — май ойидан бошлаб хорижий давлатлар фуқаролари рўйхат бўйича янги кўчмас мулк сотиб олиш шаклида инвестиция киритиш ҳуқуқига эга бўлди, яшаш гувоҳномасини олиш учун талаб этиладиган кўчмас мулк қиймати миқдори Тошкент вилояти ва Тошкент шаҳрида 400 000 доллардан 300 000 доллар эквивалентигача камайтирилди.
Бу биринчи навбатда хорижий компаниялар билан ишлайдиганларга россияликларга қизиқ бўлади, дейди KRK Group консалтинг компаниясининг Люксембургдаги ваколатхонаси раҳбари Никита Рябинин:
Ўзбекистон экспорт-импорт операциялари учун ташқи дунё билан муайян тўловларни амалга ошириш имконини берувчи юрисдикциялардан бирига айланди ва логистиканинг бир қисми ҳам республика орқали ўтади. Компаниялар ушбу юрисдикция имкониятларини фақат мамлакатга инвестициялар эмас, балки баъзи операциялар нуқтаи назаридан кўриб чиқадилар.
Чет элликлар оқими фонида квартира ижараси қимматлаша бошлади, аммо Тошкент ҳали ҳам Москвадаги нархлардан йироқ. Шу билан бирга, бу ерда бизнес қилиш анча осон, дейди арома мойларини сотувчи Анна:
Тошкентга кўчиб келганимда бу бозор ҳақида умуман ҳеч нарса билмасдим, лекин ҳозир ҳафтада учта учрашув ўтказаман. Таққослаш учун, Россияда ҳафтада биттаси зўрға ўтказардим. Тошкент бозори мен учун жуда серҳосил.
Ўзбекистонга кўчиб ўтишнинг энг осон йўли — IТ мутахассис бўлиш
Руслан исмли IТ мутахассис ҳозир ўз бизнесини Москвадан Ўзбекистонга ўтказмоқда:
Тўғрисини айтсам, Россиядан кетиш ниятим йўқ эди, лекин вазият туфайли бутун бизнесим барбод бўлди. Кўпгина шартномалар Америка ва Европа лойиҳалари билан боғлиқ эди. Шу учун Ўзбекистонга келишим билан рўйхатдан ўтганман, халқаро карталарини очдим — биз учун халқаро тўловлар жуда муҳим.
Украинада уруш бошланганидан кейин қанча россиялик ўз мамлакатни тарк этганини аниқлашнинг иложи йўқ. Расмийлар бундай статистикани сақламайдилар, аммо мутахассисларнинг фикрига кўра, камида 200 минг киши ҳақида гапириш мумкин.
Аввалроқ Ўзбекистонга кўчиб ўтган беларуслик IТ мутахассислар таассуроти ҳақида хабар берилган эди.
Изоҳ (0)